“El Parque de los Pericones ye’l primeru que se construyó en Xixón de les sos característiques gracies a un gobiernu socialista y, por tanto, exemplu de cómo’l PSOE foi capaz de tresformar los barrios del conceyu ganando espacios d’usu públicu en desterciu de la especulación urbanística”. Asina lo aseguró’l candidatu a l’alcaldía Luis Manuel Flórez ‘Floro’ nun actu celebráu n’El Llano. Ellí presentó un gran proyectu d’ampliación y modernización d’esti espaciu pa que seya una zona verde de referencia na ciudá.
El proyectu preve anexionar delles parceles municipales na redolada de l’antigua Cerámica Xixonesa p’amontar en 25.000 m² los nuevos espacios verdes y que Los Pericones llegue a tener, d’esta miente, más de 500.000 m² de superficie destinaos al usu y esfrute de vecines y vecinos. A les zones de paséu y xuegos yá esistentes, va sumase una pista d’atletismu pa la práctica del running, espacios de ximnasia de caltenimientu, calistenia, delles canches deportives, zones d’hostelería con terraces, un nuevu parque infantil y, amás, va ameyorase la rede de caminos.
Esta sablera verde, que da serviciu principalmente a El Llano, Ciares y Contrueces, va cuntar tamién con una escuela de 0-3 años. Coles mesmes, dientro de les actividaes culturales que’l PSOE quier siguir desenvolviendo polos barrios, el parque de Los Pericones, enclave con unes privilexaes vistes sobre la ciudá, va allugar una programación específica en dómina braniza: música, esposiciones, actividaes culturales y zona d’alcuentros.
El secretariu xeneral de l’Agrupación Municipal Socialista de Xixón, Monchu García, definió’l parque como una exa vertebradora de dellos barrios de la ciudá, por eso, queremos dir más allá, potencialo y xenerar más ufiertes d’ociu y servicios”.
Per otru llau, nel actu, les y los socialistes repasaron dalgunes de les cuestiones del so programa de gobiernu, un programa rigorosu, seriu y realista, frutu del diálogu constante, de les casi 500 xuntes calteníes y de la Conferencia Política, celebrada en febreru, na que participaron asociaciones, entidaes y la ciudadanía.
“Fuximos de les competiciones d’escurrimientos y de lo que ye bono de dicir pero difícil de faer. Ye un programa con numberoses propuestes pal curtiu, mediu y llargu plazu en materia d’empléu, economía, riqueza, vivienda, educación, servicios, igualdá, salú, movilidá y cultura. Ta pensáu p’ameyorar les condiciones de vida de les vecines y vecinos”, indicó Carmen Eva Pérez, númberu 2 de la candidatura.
El PSOE tamién recordó a tol gran equipu que forma la candidatura. “Tenemos tolo necesario pa da-y un nuevu entorno a esta ciudá. Hai equipu, hai programa de gobiernu, hai proyectos singulares como’l Plan Mariña o’l Proyectu Periconos que presentemos güei cuestiones realistes y realizables, que s’afaen a les necesidaes de la ciudá y qu’ameyoren la vida de les persones y la so redolada”, añedió señaló’l candidatu.
Monchu García, pela so parte, amosóse bien satisfechu col equipu y col programa de gobiernu, de la qu’añedió que “a diferencia d’otres organizaciones, vivimos procesos democráticos y cuntamos con un programa que coordinaron los socialistes pero que ta fechu pol conceyu”.
Pa rematar, Floro recordó n’El Llano que la zona demuestra’l tresformamientu que los gobiernos socialistes fueron capaces de realizar. “Atopamos no que fai non tantos años yera la Cábila, un asentamientu de chabolos que güei ye zona residencial y pulmón verde de la ciudá. Pa llevalo a cabu precisen les trés uves: Valentía, Valores y Voluntá, y ye xusto lo que tien el PSOE y de lo que ta fechu’l nuesu programa de gobiernu, por eso, vamos defender lo que pensamos y lo que pensamos nun ye otra coses qu’ameyorar esta ciudá, porque llegó’l momentu de Xixón, del so nuevu tresformamientu”, concluyó.
