La xunta directiva del recintu de Feries y Esposiciones d’Asturies aprobó una ampliación de capital por importe de 13.997.159 euros pa financiar el proyectu de reforma integral del recintu Ferial Luis Adaro, que va modernizar les sos instalaciones y servicios. Con esta ampliación el capital, el consorciu va asitiar en 37,72 millones frente a los 25,72 actuales.
Nesta operación nun va participar Unicaja, que la so parte proporcional de l’ampliación va asumir Caxa Rural d’Asturies, que se va incorporar como nuevu sociu al consorciu. Pela so parte, la Cámara de Comerciu d’Uviéu, sociu minoritariu, tamién va intervenir calteniendo la so cuota.
La conseyera de Transición Ecolóxica y presidenta del consorciu, Nieves Roqueñí, destacó’l “ampliu consensu alcanzáu por tolos accionistes p’aprobar una operación que va dexar la modernización del recintu y l’adaptación de les sos instalaciones a los requerimientos medioambientales y de sostenibilidá”. Tamién valoró la incorporación de Caxa Rural d’Asturies y la vinculación de la entidá a les instalaciones xixoneses, onde tien la voluntá de cuntar con un área propia. “Con esti proyectu, el Principáu va disponer d’un recintu moderna, sostenible y colos estándares de confortabilidad y servicios afayadizos pa un espaciu d’estes característiques”, añedió la conseyera.
El proyectu contempla, ente otres actuaciones, la reforma de la instalación llétrica y de la rede de saneamientu, amás de la incorporación de nuevos sistemes de lluz y eficiencia enerxética y meyores en dellos pabellones. Asina, va reformase’l palaciu de congresos y va ampliase’l pabellón de les Naciones hasta doblar la so superficie, amás de modernizar el so aspectu.
Tamién se va habilitar un accesu al recintu pol nuevu vial que va xunir la cai del Doctor Fleming cola carretera del Piles al Infanzón, colindante col parque Hermanos Castro. La torre d’entrada va acondicionase como espaciu habitable con un ascensor panorámicu d’accesu.
Con estes obres consiguiráse un complexu más sostenible y eficiente dende’l puntu de vista enerxéticu y con meyores servicios y más funcionales p’acoyer actividaes. Tamién se va amenorgar la buelga de carbonu p’algamar la neutralidá d’emisiones, pa lo cual prevese la instalación de paneles solares nos techos de los distintos edificios. D’esta miente, va facilitase la puesta en marcha d’una comunidá enerxética.
