XIXÓN, 21 de marzu de 2022.- Al rodiu de 50 axencies d’eventos y axencies especializaes del sector MICE de toa España van aportar a Xixón del 6 al 8 de xunu pa participar nel Iberian MICE FORUM Edición Nacional, el principal alcuentru d’esti tipu d’España y Portugal. A la ciudá van llegar otros tantos proveedores de servicios de la Península pa tener cites comerciales colos primeros. Esti foro comercial celébrase cola collaboración del Xixón Convention Bureau y col impulsu de la mesa de concertación social Xixón Tresforma.

Asina anunciólo güei l’alcaldesa de la ciudá asturiana, Ana González, na presentación del eventu realizada na Casa Conceyu de Xixón. Nesa presentación tamién intervinieron Graciela Blanco, viceconseyera de Turismu del Principáu d’Asturies; Andrés Merino, fundador y direutor d’Iberian MICE Forums; y Daniel Martínez Junquera, direutor de Visita Xixón.

Los Iberian MICE Forums son los eventos one-to-one de referencia de la industria ibérica de conceyos y eventos, nos que se convoca a organizadores de conceyos y eventos corporativos de los principales mercaos nacionales y d’Europa Occidental p’afitar rellaciones comerciales de confianza con proveedores y destinos MICE españoles y portugueses.

Ta previsto que, nel eventu, que va celebrase nos hoteles Abba Playa Gijón y NH Gijón, se realicen más de 1.000 conceyos one-to-one. Estos conceyos van complementase con sesiones de formación y actualización nes tendencies del sector y con un programa social intensu pa favorecer los venceyos personales ente compradores y proveedores, amás d’amosar los meyores recursos pa eventos del destín anfitrión. 

Arriendes d’ello, el fin de selmana enantes del alcuentru, Turismu d’Asturies va ufrir a los organizadores de conceyos y eventos delles rutes temátiques pela rexón p’amosar los recursos y esperiencies pa eventos n’Asturies.