El Sporting nun puede col Nantes

José Alberto caltuvo'l 4-3-3 habitual de la pretemporada, con Javi Fuego como exa y Manu García y Nacho Méndez a les sos bandes

0
661
El Sporting nun puede col Nantes
Un momentu del partíu. / Real Sporting

El Sporting perdió por 2-0 énte’l Nantes nel Estade Moreau Defargues de Le Baule nel segundu amistosu de pretemporada. El partíu empezó con un peligrosu llanzamientu de falta de Djuka, qu’estenó’l porteru a córner. Caltenía José Alberto‘l 4-3-3 habitual de la pretemporada, con Javi Fuego como exa y Manu García y Nacho Méndez a les sos bandes. Tamién volvió decidise por alliniar a Djuka en punta con Álvaro Vázquez basculado a la banda esquierda.

Tres una acción a balón paráu sacada en curtiu, nel minutu 7, combinaron Manu García y Nacho Méndez, con centru a Babin, que remató de cabeza. El balón salió fora por pocu. Nel minutu 18 señaláron-y pena máxima a Javi Fuego. Llegaba’l 1-0 pa los locales, obra de Abdoulaye. Nun paeció n’absolutu que fuera pena máxima. Costó-y la tarxeta mariella al polesu por protestar.

El Nantes, con una selmana más de preparación, amosaba más frescura nes sos piernes

Cumplida la primera media hora, Diego Mariño realizó una magnífica parada. El Nantes, con una selmana más de preparación, amosaba más frescura nes sos piernes. El Sporting respondía con posicionamientu. José Alberto facía correcciones a los sos xugadores. Col 1-0 favorable a los locales algamó’l descansu.

Tres el mesmu, José Alberto dio entrada al terrén de xuegu a Espeso por Damíán, a Neftali por Javi Fuego y a Carmona por Aitor. Carmona pasaba a xugar per dientro con Neftali na banda derecha. Los siguientes n’entrar fueron Pelayo Suárez, Pablo Pérez y Isma Cerro, respectivamente, por Babin, Manu García y Álvaro Vázquez. Corría’l minutu diez d’esta segunda parte. Pablo Pérez foi amonestáu por una entrada a un rival de siguíu.

Nel minutu 13, una combinación pola esquierda roxiblanca abrió’l balón dientro de la área francesa. Nun llegó por bien Djuka, a que los sos pies llanzar el porteru. José Alberto escosaba los cambeos nel minutu 22. Colábense Diego Mariño, Unai, Cristian Salvador, Nacho y Djuka. Entraben Christian Joel, Molinero, Marc Valiente, Gragera y Pedro Díaz. Pablo Pérez colocábase en punta.

El movimientu de los banquinos restaba continuidá al xuegu. Nel minutu 75 llegó’l 2-0, cola firma de Imram. Un tanto de magnífica execución. Chutó dende la frontera de la área con efectu y allugamientu. Nel 84, gran xugada d’ataque roxiblancu. El balón llegó en boa de gol a Neftali, pero sacó-y el remate’l porteru. Allegó bien forzáu al refugue Pablo Pérez, qu’unvió fora. Nel últimu minutu Christian Joel realizó una bona parada. Col 2-0 concluyó’l partíu.