El Sporting alcordó esti miércoles pesllar al públicu la Escuela de Fútbol de Mareo con calter preventivu y dende esti miércoles. El club sigui les directrices marcaes per parte del Ministeriu de Sanidá, LaLiga y la Federación Española de Fútbol. L’accesu a les instalaciones va tar llindáu puramente al personal llaboral del club, xugadores de les distintes categoríes, técnicos, y demás personal con autorización especial.
La midida estiéndese, hasta nuevu avisu, a tolos entrenamientos de toles categoríes. Los medios de comunicación nun van poder aportar, hasta nuevu avisu. Suspenderánse amás les ruedes de prensa diaries. Les Taquilles del Club van caltener la so actividá y horariu d’apertura habitual hasta nueva orde. «Llamentamos les molesties causaes por esta situación, qu’esperamos sía temporal, y que s’adoptaron pol bien y la seguridá de toos aquellos que formen parte de la gran familia del Sporting», remata’l comunicáu.
Enmarcáu nel actual contestu sanitariu de prevención, el Sporting entrenó esta mañana en Mareo a puerta zarrada nel más estrictu de los sentíos. Prepara asina la visita a un campu de Riazor que va amosar unes graes vacíes. Djukic tien les baxes médiques de Marc Valiente y de Bogdan y vuelve tener a disposición a Cristian Salvador tres el partíu de suspensión que cumplió. Nun hai novedaes nesti sentíu.
El Sporting ta devolviendo l’importe de les localidaes que mandara a Xixón el Dépor para la so venta n’El Molinón. Nel Dépor, a les yá confirmaes de Mollejo, por sanción, y Bóveda y Sabin Merino, por mancadura, podría sumase la de Salva Ruiz, quien tuvo que retirase del entrenamientu del martes por cuenta de nueves molesties musculares. D’otru llau, la entidá gallega emitió ayeri un comunicáu pidiendo l’aplazamientu del so dos próximu compromisos; el primeru d’ellos, el d’esti sábadu énte’l Sporting.
