El Sporting prescinde de Miguel Torrecilla

Javi Rico asume la Dirección Deportiva mientras tres temporaes

0
328
Miguel Torrecilla
Miguel Torrecilla. / Chus Monteserín (Real Sporting)

Miguel Torrecilla nun va siguir la próxima temporada como Director Deportivu del Sporting. Asina lo comunicó esta mañana’l club. El conseyu d’alministración del equipu alcordó nun anovar el so contratu, que remata’l próximu 30 de xunu. «Valoramos el llabor y l’esfuerzu de Miguel Torrecilla na organización de la estructura y métodu de trabayu de la Dirección Deportiva del Sporting, amás del so compromisu y dedicación personal col club nestes trés temporaes», señala’l comunicáu.

L’asturianu Javier Vicente Rico va asumir esti llabor a partir d’entós. Va permanecer nel club mientres los trés próximes temporaes. Javi Rico (Xixón, 1971), foi xugador del Sporting B y exerció como Director Deportivu nel Pontevedra CF mientres 6 temporaes. Tamién emprestó los sos servicios como Secretariu Técnicu del Real Valladolid, foi miembru de la Secretaría Técnica del Real Zaragoza y responsable de la firma Promosport. N’actualidá y dende va dos temporaes desenvolvía la so actividá na Secretaría Técnica de la Real Sociedá.

La dirección del club xixonés destaca que la incorporación de Javier Rico supón «dar un pasu más nel apueste pola cantera como base de la estratexa deportiva de la entidá, con una persona llargamente conocedora de la Escuela de Mareo, el so funcionamientu y los valores nella instauraos».