El TELECABLE H.C. encara esta fin de selmana una cita importante nel so calendariu como ye la disputa de la Copa Intercontinental nel míticu palaciu de deportes Aldo Cantoni, de San Juan, n’Arxentina.
La espedición, tres l’accidentáu viaxe qu’obligo al avión a esviase a Montevidéu por cuenta d’una nube que cayía sobro Bonos Aires, ta aclimatándose bien a la diferencia horaria y entrenando con normalidá, apostando nel día d’ayeri un alcuentru énte un combináu de la Federación Porteña de Patín, al que venció con comodidá (8-0) y nel que toles xugadores tuvieron a bon nivel, ensin que se notara especialmente la descompensación horaria.
El rival del vienres (23:00 hora española), en semifinales, va ser el Club Social y Deportivo Aberastain, un equipu que conxuga una plantiya na que veteranes y moces formen un equipu equilibráu nel que destaquen les sos goliadores Marta Isabel de Sa Monteiro y Paula Agustina Ortega. Asina mesmu, el conxuntu sanjuanino incorporó pa esti tornéu a l’arquera internacional Anabella Flores quien yá xugó l’anterior Intercontinental cola Concepción que se proclamó campeón énte’l TELECABLE.
A parte de les sos cualidaes como conxuntu, l’Aberastain va tener la so principal baza en cuntar col sofitu incondicional d’una afición que vive’l h.oquei patinos con verdadera pasión y va facer tolo posible por que el anfitrión tea na final del tornéu.
La otra semifinal, la que va enfrentar al Andes Talleres, de Mendoza, contra’l Generali Palau, va tener llugar el sábadu a les 23:00 hora española.
