La Conseyería d’Educación recibió esta mañana la notificación de la suspensión de les clases en seis centros poles incidencies del temporal. Les direcciones de los colexos tomaron la decisión, na mayor parte de los casos, pola ausencia d’alumnáu énte la interrupción del serviciu de tresporte escolar. N’otros 25 centros educativos echaron voz de dalgún tipu d’incidencia venceyada a les condiciones meteorolóxiques.
En concretu, los seis centros qu’atayaron les sesiones lectives son: el Colexu Públicu El Truébanu, n’El Campu; el Colexu Públicu San Jorge, n’Ibias; el Colexu Rural Agrupáu Santarbás en Bruelles, Cangas; el Colexu Rural Agrupáu Valle del Naviegu, en Bimeda, Cangas; el Colexu Públicu de Zarréu, en Degaña, y l’escuela de Truenes, perteneciente al Colexu Rural Agrupáu Santana en Cangas.
L’asistencia d’alumnos foi prácticamente testimonial nel Colexu Rural Agrupáu Ríu Cibea, en Cangas, a onde solo allegó un 10% del alumnáu que nun precisa tresporte. El Colexu Aurelio Menéndez de Santantolín tampoco recibió a estudiantes que precisen movese en vehículos hasta’l centru. En total, echaron voz de incidencies venceyaes a la envernada 31, de los aprosimao 400, centros educativos del Principáu.
Preemerxencia
El Serviciu d’Emerxencies del Principáu (Sepa) caltien en situación 3 el nivel de preemerxencia del Plan Nevaes, que con calter xeneral permanez activáu nesta fase de vixilancia y siguimientu ente’l 1 de payares y el 30 d’abril de cada añu. Les previsiones de l’Axencia Estatal de Meteoroloxía señalen que la cota de nieve va xubir nes próximes hores. Sicasí, dende’l SEPA caltiense la vixilancia poles posibles agües. “Tán solliviándose los banzaos y tase pindiu del nivel de los ríos que ye lo qu’agora más esmolez”, destacó güei la conseyera de Presidencia, Rita Camblor, que se movió hasta’l conceyu de Salas pa interesase pola situación de dellos desprendimientos de tierra.
Unu de los argayos afectó a una cabana ganadera, ente que’l segundu obligó a desallugar a los residentes de dos viviendes de la localidá de Villazón, nel citáu conceyu. Los bomberos del Sepa trabayen pa tratar de controlar la situación de la fastera. “Mientres la xornada rexistráronse distintes incidencies y por fortuna nun hubo nengún dañu en persones”, destacó la conseyera.
Estáu de la rede viaria
L’últimu informe disponible de les 09:00 hores reflexa qu’hai 19 tramos de carreteres y puertos zarraos y otres 36 víes que riquen l’usu de cadenes. Como incidencies destacaes nes víes, la pasada nueche cortar al tráficu la carretera Colunga-Llastres (AS-257) pol frayatu de la plataforma nel puntu kilométricu 1,50. Tamién ta zarráu al tráficu un carril na vía AS-14, que xune Grandas de Salime y la Ponte del Infiernu, por un carcavón rexistráu nel puntu kilométricu 40,800. Coles mesmes, la carretera CL-2 Lliberdón-Ceceña ta cerrada pa vehículos llargos.
La zona onde más incidencies se rexistraron ta nel conceyu de Cangas, onde hai problemes nos accesos a dellos núcleos de población. Los técnicos de la Conseyería d’Infraestructures, Mediu Ambiente y Cambéu Climáticu tán trabayando pa solucionar toles incidencies.
Control preventivu nel Hospital del Oriente
Nel Hospital del Oriente Francisco Grande Covián activóse l’alerta mariello pola crecida del ríu. Esta situación supon caltener un control preventivu. D’esta miente, ta activáu’l comité d’emerxencies y el protocolu correspondientes, lo qu’implica la supervisión continua de la situación. Esta situación nun afecta a la prestación sanitaria, que se ta realizando con total normalidá. Sicasí, va caltenese el comité d’emerxencies activu mientres la fin de selmana por si les condiciones empioren.
