La Conseyería de Mediu Rural y Cohesión Territorial axudicó por 195.297 euros a la empresa Promogrado S.L. les obres de renovación integral del teyáu del edificiu alministrativu de la rula de Llastres, en Colunga.
Esta actuación, que va dotar les instalaciones d’una nueva xeometría que va ameyorar notablemente’l diseñu actual, inclúi tamién intervenciones sobre los bistechos y el teyáu de la nave. Nesti sentíu, va sustituyise’l material esistente por otros que van aumentar sustancialmente la eficiencia enerxética de la instalación. Los trabayos na rula tienen un plazu d’execución de trés meses y cunten con financiamientu del Fondu Européu Marítimu y de Pesca (FEMP).
Estes obres, que s’enmarquen na Estratexa pal sector pesqueru d’Asturies 2021-2030, impulsen la modernización del sector y promueven tamién el relevu xeneracional. El Principáu pretende ameyorar sustancialmente les condiciones de trabayu na pesca, con instalaciones modernes y competitives. Asina, la combinación de los métodos artesanales emplegaos pola flota asturiana y de les meyores nos equipamientos onde se procesen les captures va dexar poner en valor los pexes y mariscos desembarcaos y rulados.
Al marxe d’esti proyectu, el Principáu llevó a cabu otres intervenciones nel puertu de Llastres, onde l’añu pasáu estableció un puntu d’información turística ya instaló la esposición permanente Nuesa mar y les sos xentes, coles mires de sopelexar l’importante llabor desenvueltu pol sector pesqueru.
