Per séptima vegada, la xusticia dicta sentencia a favor de la Universidá d’Uviéu nos procesos abiertos con relación al treslláu de los estudios de minería d’Uviéu a la Escuela Politécnica de Mieres. Nesti casu, la sala de lo Contencioso-Alministrativu del Tribunal Cimeru de Xusticia d’Asturies considera llegal el decretu de la Conseyería de Ciencia, Empreses, Formación y Empléu del Principáu d’Asturies pol que se suprime la Escuela d’Inxeniería de Mines, Enerxía y Materiales d’Uviéu.
L’Asociación Think Tank Escuela de Mines d’Uviéu 2025 demandara de forma conxunta al Principáu d’Asturies y a la Universidá d’Uviéu por esti decretu de supresión. L’altu tribunal asturianu conderga tamién a la organización demandante a asumir los costes, por un importe total de 1000 euros. La principal novedá nesta sentencia ye que la xusticia fai referencia per primer vegada a la supresión de la Escuela de Mines d’Uviéu, mientres que les anteriores sentencies teníen por oxetu namás el treslláu de los planes d’estudios a Mieres.
Nun ye la primer vegada que l’altu tribunal asturianu dicta sentencia a favor de la Universidá d’Uviéu al respective de los procesos abiertos pol treslláu de Mines. El pasáu mes de payares, el Tribunal Cimeru de Xusticia d’Asturies tornó’l recursu d’apelación presentáu pol Conceyu d’Uviéu contra la sentencia dictada’l 30 de mayu de 2024 pol Xulgáu de lo Contencioso-Alministrativu númberu 1 d’Uviéu. Esi fallu ratificaba lo resuelto pol Xulgáu de los Contenciosu Alministrativu 1 d’Uviéu ya imponía el pagu de los costes procesales al recurrente. El TCX d’Asturies se manifestó tamién a favor de la institución académica asturiana tornando’l recursu d’apelación presentáu pol Colexu Oficial d’Inxenieros de Mines del Noroeste d’España y l’Asociación Think Tank Escuela de Mines d’Uviéu 2050 contra la sentencia dictada’l 7 de mayu de 2024 pol Xulgáu de lo Contencioso-Alministrativu númberu 6 d’Uviéu.
Na mesma llinia amosóse la primera de les sentencies del TSJ en relación con estos procesos xudiciales abiertos pol treslláu de los estudios de minería, cuando se tornó’l recursu d’apelación interpuestu pol Conceyu d’Uviéu contra’l fallu del Xulgáu Contenciosu-Alministrativu númberu 2 d’Uviéu del 19 de febreru de 2024, na que tornaba’l recursu presentáu pol Consistoriu uvieín contra’l treslláu de los estudios de minería a la Escuela Politécnica de Mieres. La sentencia reflexaba que la universidá siguiera escrupulosamente’l procedimientu pa esti tipu d’actuaciones y que’l treslláu de los estudios nun suponía nengún perxuiciu pa la ciudá d’Uviéu.
A lo último, el pasáu 30 de mayu, el Xulgáu de lo Contencioso-Alministrativu númberu 1 d’Uviéu refugó’l recursu presentáu pol Conceyu d’Uviéu énte dichu tribunal contra la desestimación de la solicitú de personación nel espediente de supresión del centru. La sentencia reflexaba que la universidá actuaba como solicitante y que nun cometiera irregularidá dalguna nin provocó indefensión al conceyu, y añedía que l’espediente foi sometíu a información pública.
