L’Ayuntamientu de Xixón acoyó esti xueves la presentación de los trofeos que van recibir el ganador y finalista del Xixón Open – ATP 250 que va entamar esti sábadu nel Palaciu de Deportes La Guía. L’alcaldesa, Ana González, tuvo acompañada pol director del tornéu, Tomás Carbonell; el presidente de la Federación de Tenis del Principáu d’Asturies (FTPA), Fernando Castaño; y l’autor de la obra, Juan Jareño.
L’actu sirvió pa presentar tamién los actos paralelos que se van entamar na ciudá con motivu del eventu, ente ellos una esposición de tenis nel Muséu del Pueblu d’Asturies, una charra colos capitanes españoles Sergi Bruguera y Anabel Medina, o la iniciativa Aces Solidarios.
Los trofeos del Xixón Open – ATP 250 tán inspiraos na popular escultura de Les Letronas, un símbolu contemporaneu de la ciudá que reproduz a gran escala les cinco lletres de la palabra Xixón. “El tenis ye unu de los deportes nos que la identidá ente troféu y competición ye más fuerte, ye una simbiosis bien potente. Podemos identificar competiciones viendo los sos trofeos y podemos saber qué trofeos representen a cada competición. La intención pal Xixón Open yera esa”, esplicó l’autor Juan Jareño.
El reconocíu diseñador xixonés aseguró qu’el: “El deportista nun se va llevar namás un oxetu, va llevase too aquello no que Les Letronas convirtiéronse estos años. Estos trofeos son tresparentes, brillantes, pesaos, son singulares, dinámicos y plurales… Xixón entrénase pa tener toos estos valores.”
