La sala Lata de Zinc d’Uviéu acueye esti eventu nel que van tocar Sandra Álvarez y Noemí González, Mostru l’Horru, Guieldu y Ochobre El 9 de febreru la sala Lata de Zinc d’Uviéu va acoyer el II Semando Fest, festival de música moza n’asturianu. Nél van participar Sandra Álvarez y Noemí González con un espectáculu qu’axunta poesía feminista y asturianada; Mostru l’Horru, col so hiphop reivindicativu; Guieldu, banda de folk celta y new age; y Ochobre, formación de punk astur. Son distintos estilos pa reflexar la diversidá sonora de la música asturiana. L’eventu escosó toles entraes el pasáu llunes, amosando l’interés que xenera la música’l país y el valor qu’aporta pa la propia escena que’l públicu pague por consumila.
Tres la exitosa edición del añu pasáu -que tamién escosó entraes díes enantes de la so celebración-, vuelve’l festival de música moza n’asturianu qu’entama Musicasturiana.com ya Ixuxú Cultura. Nél van volver a participar cuatro proyectos d’estremaos estilos musicales cola característica en común de que la mayoría de los sos componentes son menores de 34 años y nos que destaca tamién qu’hai una importante presencia femenina, con siete muyeres que van tar enriba l’escenariu. D’esta manera, el Semando Fest trabaya tamién por avanzar hacia la igualdá dientro de la música n’asturianu.
Precisamente, la iniciativa va más allá de ser un simple conciertu y por eso tien tou una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.
Equipu xoven y patrocinadores
Amás de les y los componentes de los grupos, l’equipu del Semando Fest ta formáu por xente mozo: el diseñu ye obra de la diseñadora Beatriz Menéndez (Uviéu, 1992) col so proyectu Made in Chigre; la fotógrafa Leticia Cernuda (Piloña, 1992), de Díes Adulces, va facer les semeyes y el videu del festival; Raúl Alonso (Xixón, 1999) y Yedra Riesgo (Pravia,
1997) d’Héroes Ensin Nome van volver a presentar la gala y desendolcar llabores de producción; Enar Areces (L’Entregu, 1990) de Puru Remangu va encargase de la venta de
merchandising; y Xicu Ariza (Xixón, 1989), responsable d’Ixuxú Cultura y Musicasturiana.com, ye’l coordinador de tol proyectu.
Distintes entidaes públiques y privaes vuelven a patrocinar esti eventu ayudando asina a la
so viabilidá económica. Son el Principáu d’Asturies, la Fundación Caja Rural de Asturias, el
Conseyu de la Mocedá del Principáu d’Asturies y el Conseyu de la Mocedá d’Uviéu.
