La Comuna d’Asturies, entidá que forma parte de la Coordinadora Estatal d’Apoyu a la Querella Arxentina (CEAQUA), trai a Asturies el documental Las tres muertes de Teófilo del Valle (2023). Va proyectase en trés actos onde van participar el director de la película, Manuel de Juan, y la periodista y activista Llum Quiñonero. Les cites son esti miércoles 31 de xineru en Sama (Llangréu), nes Escueles Dorado, a les 19:30 h; el xueves 1 de febreru en Xixón, nel Centru de Cultura Antiguu Institutu, a les 19 h; y el vienres 2 de febreru en Mieres, na Casa de Cultura Teodoro Cuesta, a les 20 h.
El 24 de febreru de 1976, cuando’l sector del calzáu n’Elda (Alacant) vivía unes movilizaciones obreres, un policía armada mata per detrás a Teófilo, que daquella yera un rapaz. Foi’l primer asesinatu policial de la monarquía de Xuan Carlos I. La dictadura de Franco taba intacta, pero un xuez resistió la presión del poder pa eliminar les pruebes qu’incriminaben al policía. Manuel de Juan, que participó naquel entós nes movilizaciones, investigó en xulgaos y archivos militares pa saber más d’aquellos socedíos tan tráxicos. Los familiares de Teófilo tovía siguen aguardando pola xusticia.
Manuel de Juan ye miembro d’Acción Ciudadana contra la Impunidad del Franquismo del País Valencià. Ye guionista y director de Las tres muertes de Teófilo del Valle. Llum Quiñonero Hernández ye presidenta d’Acción Ciudadana contra la Impunidad del Franquismo del País Valencià. Ye periodista, autora de munchos artículos y investigaciones en materia de memoria y feminismu, ente ellos los llibros Nosotras que perdimos la paz (2005) y Miquel Grau 53/1977 (2019) o’l documental Mujeres del 36 (1998).
