El presidente d’Asturies, Adrián Barbón, escoyó a Eva Ledo pa liderar la nueva etapa de la Conseyería d’Educación y poner en marcha tolos compromisos recoyíos nel prealcuerdu alcanzáu colos sindicatos pa fortalecer el sistema educativu públicu. La nueva conseyera d’Educación va tomar posesión el próximu llunes, 16 de xunu, antes de la xunta del Conseyu de Gobiernu.
Nuna rueda de prensa celebrada na tarde d’ayeri, Barbón valoró la esperiencia de gobiernu de Ledo, a quien agradeció’l pasu alantre y encamentó-y caltener los calces de diálogu reabiertos col personal docente y les organizaciones sindicales tres el prealcuerdu algamáu’l llunes, “que supón un pasu fundamental”.
“La nueva conseyera cree na educación pública asturiana, ye mui respetada y valorada y agradeció descomanadamente qu’aceptara, porque ella foi la única opción sobre la mesa”, esplicó’l xefe del Executivu.
Eva Ledo (Avilés, 1966) ye inxeniera industrial especializada n’Eletricidá. Dende 1995 ye funcionaria de carrera del Cuerpu de Profesores d’Enseñanza Secundaria nes especialidaes de Tecnoloxía y Sistemes Electrónicos y Automatismos y forma parte del cuerpu d’Inspectores d’Educación dende 2014. Foi directora xeneral de Personal Docente y de Centros y Rede 0-3 años, mesmo que presidenta del Conseyu d’Asturies de la Formación Profesional.
Hasta agora exercía como subdirectora xeneral de Programes y Xestión del Ministeriu d’Educación y tamién tien esperiencia nos ámbitos de la siderurxa, la informática y l’inxeniería de proyectos.
Mientres la so intervención, el presidente pidió esculpes a les families poles consecuencies del conflictu educativu y valoró’l compromisu de la exconseyera Lydia Espina, “que con enorme arrogancia dimitió pa favorecer la busca d’un alcuerdu y volver tender pontes”. Tamién espresó la so reconocencia pol esfuerzu de los equipos negociadores, que llograron algamar un alcuerdu pa fortalecer la educación pública, tanto pela parte sindical como pol equipu del Gobiernu d’Asturies, encabezáu pola vicepresidenta, Gimena Llamedo, y el conseyeru de Facienda, Xusticia y Asuntos Europeos, Guillermo Peláez.
