El presidente del gobiernu d’Asturies, Adrián Barbón, suscribió güei cola ministra de Defensa, Margarita Robles, y l’alcalde d’Uviéu, Alfredo Canteli, el conveniu pa ordenar los terrenes de la fábrica d’armes de La Vega, pol que’l Gobiernu d’Asturies se compromete a mercar y rehabilitar la nave del taller de cañones.
«La firma d’esti conveniu ye una reconocencia de lo que significa’l diálogu ente alministraciones. Anque tengamos posiciones ideolóxiques distintes, sabemos que la ciudadanía quier que se resuelvan los sos problemes y l’oxetivu ye llegar a un alcuerdu. Creo, bonalmente, que nesti casu supimos facelo», valoró’l xefe del Executivu, quien añedió que, con esti pactu, «Uviéu gana y Asturies gana».
L’alcuerdu recueye los términos concretos de la collaboración ente les trés alministraciones pa tramitar los preseos de planiamientu y xestión urbanística necesarios pa recuperar La Vega. Amás, va dexar poner al serviciu de la capital asturiana una superficie de 120.000 metros cuadraos nun allugamientu estratéxicu y perbién comunicáu.
El documentu establez l’oxetivu común de reordenar los terrenes y reintegrarlos na ciudá por aciu un réxime d’usos diversificaos qu’inclúi la creación de zones verdes, el caltenimientu d’una parte significativa del patrimoniu históricu ya industrial, la implantación de vivienda pública y la creación d’un polu empresarial, tecnolóxicu y d’espardimientu de la conocencia que caltenga una actividá granible.
Los compromisos concretos qu’adquier el Gobiernu d’Asturies son los siguientes:
– Collaboración, nel ámbitu de les sos competencies, en materia d’ordenación del territoriu y urbanismu, medioambiente y patrimoniu cultural y monumental, mesmo que na tramitación de los documentos necesarios pal desenvolvimientu del ámbitu d’actuación.
– Alquisición, por aciu compraventa al Ministeriu de Defensa, del terrén resultante de la reparcelación correspondiente a la nave del taller de cañones, xuntu con dicha nave. La compra va facese nel plazu máximu d’un añu dende la so inscripción rexistral y la tasación va andar ente 4 y 4,5 millones. El gobiernu va asumir tamién la rehabilitación del inmueble.
