Foru expedienta a Leal poles «faltes de respetu» a la dirección del partíu

La presidenta Carmen Moriyón llamenta que'l diputáu "boicotie" el funcionamientu del partíu

0
614

La presidenta de Foru Asturies, Carmen Moriyón, anunció esti martes que solicitara l’apertura d’un espediente al diputáu na Xunta Xeneral Pedro Leal. «Lleguemos a la nuesa llende de tolerancia coles sos faltes de respetu y el so boicó permanente a la dirección del partíu». La presidenta defendió qu’un partíu políticu ta pa sirvir a la sociedá y non pa solliviar les «frustraciones personales». La exalcaldesa de Xixón aseguró que’l diputáu «enxamás formó parte de nenguna llista y namás aportó a los puestos qu’ocupa pol arrenunciu d’otros”.

Moriyón calificó de «inaceptable» qu’un diputáu «desobedezca con esa altiveza». Tamién llamentó que «boicotie» el funcionamientu del partíu «ensin importa-y a quién se lleva per delantre, como los proveedores que nun tán cobrando lo que se-yos debe». La solicitú d’espediente disciplinariu yá foi cursada al Comité de Garantíes Estatutaries. El documentu detalla faltes leves, graves y bien graves. La dirección de Foru destaca la desobediencia del diputáu nel votu de los presupuestos, los «insultos» contra’l voceru parlamentariu y la «negativa a cumplir les ordes directes y repitíes de proceder al pagu a provisores».

D’esta manera, la dirección del partíu dexa’l futuru de Leal en manes del Comité de Garantíes Estatutaries. «Llamento que la representación de Foru recayera nuna persona que dio sobraes amueses de nun ser capaz de llevala a cabu cola dignidá que la institución y los asturianos merecen», concluyó Moriyón.