Fran Albert: “Asturies ye un llugar privilexáu pa una temporada”

El so oxetivu como preparador ye “conocer lo meyor posible a cada xugador pa poder sacar depués lo meyor d'él”

0
759
Fran Albert. / Juan Llavío (Real Sporting)
Fran Albert. / Juan Llavío (Real Sporting)

Fran Albert, acabante llegar a Mareo p’asumir la preparación física del primer equipu del Sporting, tien una primer idea na so cabeza: «Conocer lo meyor y antes posible a cada xugador pa poder sacar depués lo meyor d’él», anque yá dende selmanes cunta con datos de la gran mayoría de futbolistes. Defende que se trata d’algamar el primer partíu de Lliga «na meyor condición posible pa poder competir», y non yá once xugadores, sinón «tolos integrantes de la plantiya; toos tienen que tar enchufados».

Ta entusiasmáu coles instalaciones de Mareo, «onde voi tratar d’apurrir lo meyor de mi y onde tou son bones sensaciones». Paez-y «fantástica» la cercanía que se vive ente’l primer equipu y los xugadores más nuevos. Tamién ta feliz con «Asturies, un llugar privilexáu pa la temporada, pola so meteoroloxía, onde inclusive puedes trabayar físicamente a media mañana».

Tuvo a puntu de venise al Sporting «con Paco Herrera, pero nun pudi por motivos personales, anque siempres tuvi la mio mente aquí: somos una familia de llocos pol fútbol y yá con catorce años visitamos El Molinón». Tocante a José Alberto, diz que la sintonía nun puede ser meyor con él. «Conocemos desque’l so hermanu xugaba nel Salamanca, tamién tuvi nun congresu qu’entamó n’Avilés, al que me convidó». Fran Albert tien «ganes de verde», d’empezar yá los entrenamientos.