El Gobiernu d’Asturies y la Universidá d’Uviéu van diseñar un mapa qu’ayude a tolos conceyos asturianos a cumplir colos 17 Oxetivos de Desenvolvimientu Sostenible (ODS) establecíos por Naciones Xuníes na Axenda 2030. El director xeneral d’Axenda 2030, Juan Ponte, anunció esta midida tres axuntase cola catedrática de Derechu Alministrativu y directora de la cátedra Concepción Arenal, María Rosario Alonso, y dellos representantes de la so comisión permanente.
La cátedra Concepción Arenal d’Axenda 2030, creada en 2022 tres la firma d’un conveniu ente’l Principáu y l’institución académica, concluyó apocayá un diagnósticu qu’identifica los niveles de implementación de los ODS nos conceyos, col que darréu se podrán “territorializar” estes metes.
“Queremos llevar l’Axenda 2030 a les cais y a los territorios pa que la implementación de los oxetivos nun quede depués nel caxón de los despachos”, aseguró Juan Ponte, quien esplicó que la idea ye determinar, por casu, qué estratexes pueden desenvolvese en zones concretes p’arreglar los problemes de cumplimientu. “Les cuenques mineres, por citar un casu, nun tienen les mesmes necesidaes que la mariña asturiana”, precisó.
El director xeneral indicó que la Conseyería d’Ordenación de Territoriu, Urbanismu, Vivienda y Derechos Ciudadanos aumentó de 15.000 a 25.000 euros la partida destinada a esta cátedra nos presupuestos de 2024, lo que va dexar, amás, desenvolver una campaña informativa “a cuerpu de cai”.
La campaña va tener trés llínees d’actuación:
• Concenciar y dar a conocer los Oxetivos de Desenvolvimientu Sostenible a la ciudadanía.
• Asesorar a personal técnico y funcionariu de les alministraciones locales pa implementalos.
• Acompañar a los gobiernos locales nel procesu.
