La Dirección Xeneral d’Igualdá informó de que l’Institutu Asturianu de la Muyer unvió una comunicación informativa la pasada selmana a una empresa hostelera de Xixón tres recibir una quexa sobre una campaña publicitaria puesta en marcha pola citada entidá.

L’Observatoriu de la Publicidá ya Información Non Sexista del Principáu d’Asturies, dependiente del Institutu de la Muyer, comunicó a la empresa que’l so logo apaez nel cartelu, que la quexa recibida faía referencia a la campaña » Nos gustan maduritas, ¿y a ti?» y que foi incluyida en soportes publicitarios de los autobuses urbanos de Xixón.

Na mesma comunicación, l’observatoriu recordaba a la empresa que la Llei Xeneral de Comunicación Audiovisual diz nel so artículu 4.2 que “la comunicación audiovisual nunca va poder afalar al odiu o a la discriminación por razón de xéneru o cualquier circunstancia personal o social y tien de ser respetuosa cola dignidá humana y los valores constitucionales con especial atención a la erradicación de conductes favorecedoras de situaciones de desigualdá de les muyeres”.

L’Institutu Asturianu de la Muyer avisó tamién de que, amás d’incorporar la quexa nel observatoriu de publicidá non sexista, unviábalo tamién al Observatoriu del Ministeriu d’Igualdá.