– El Principáu destaca qu’en 2022 van ponese en marcha 853 equipamientos de paneles solares frente a los 23 rexistraos va cuatro años
– Enrique Fernández visita les instalaciones de Sidra Cortina en Villaviciosa, onde ta operativu unu de los primeros complexos d’autoconsumo compartíu nel sector industrial
La Conseyería d’Industria, Empléu y Promoción Económica agora una crecedera esponencial de la enerxía fotovoltaica n’Asturies, que cunta anguaño con 1.347 instalaciones con una potencia instalada de 16.826,74 quilovatios (kW). La espansión del autoconsumo con paneles solares aumentó notablemente, tal que lo demuestra’l númberu d’equipamientos puestos en marcha nos postreros cuatro años: 23 (2019); 147 (2020); 306 (2021) y 853 (2022).
Los datos fueron facilitaos pol conseyeru d’Industria, Empléu y Promoción Económica, Enrique Fernández, que visitó les instalaciones de Sidra Cortina en Amandi (Villaviciosa), onde la empresa asitió una de les primeres instalaciones de xeneración compartida con paneles solares nel sector industrial.
Nel actu participaron l’alcalde de Villaviciosa, Alejandro Vega; el director xeneral de Sidra Cortina, Celestino Cortina; la directora xeneral d’Enerxía, Minería y Reactivación, Belarmina Díaz, y representantes de les empreses que trabayaron na puesta en marcha de les instalaciones.
“La enerxía solar fotovoltaica ye presente y, sobremanera, futuru n’Asturies, a pesar de que nun ye una de les comunidaes autónomes con más recursu solar”, indicó Fernández, que tamién fixo fincapié en que los sistemes d’autoconsumo tán esperimentáu una crecedera esponencial.
El conseyeru destacó qu’esta progresión non solo ta amenorgando’l recibu eléctricu de les empreses promotores, “sinón que tamién incide nel esplegue de la cadena de valor industrial y de servicios asociada a la enerxía solar fotovoltaica, como asocede con otres tecnoloxíes como la eólica o la movilidá eléctrico y sostenible”. “Coles mesmes, contribúi al procesu de transición ecolóxica y al cumplimientu de los compromisos de descarbonización de la economía”, añadió.
Nes instalaciones puestes en marcha por Sidra Cortina n’Amandi participaron 45 trabayadores de distintes compañíes provisores, toes elles asturianes. El proyectu foi lideráu por MasNorte Enerxía, los paneles solares son del grupu Exiom, les estructures de Alusín Solar y el software de monitorización, de la inxeniería Infitech.
“Confírmase, poro, lo que dende’l Gobiernu d’Asturies manifestemos dende’l principiu: la transición enerxética non solo xenera impactos y riesgos, sinón que tamién abre oportunidaes, de presente y de futuru, para la comunidá, al xenerar valor en tola cadena industrial y de suministros asociada a estes tecnoloxíes”, indicó Fernández.
Nel llagar de Sidra Cortina instalóse unu de los primeros proyectos d’Asturies d’autoconsumu compartíu (xeneración distribuyida), que tien como usuariu final a veceros industriales. Consta de 344 paneles solares que van dexar la producción de 190.000 quilovatios per hora añales, l’equivalente al consumu de 60 families al añu. Esta producción va dar cobertoria al 55% del total de la demanda eléctrica de la empresa.
