La Conseyería d’Industria recibió dende’l 11 de marzu 9.975 solicitúes d’espedientes de regulación temporal d’empléu (ERTE). Estes peticiones tan rellacionaos cola crisis sanitaria del coronavirus. D’alcuerdu colos datos facilitaos pol Serviciu de Rellaciones Llaborales de la Dirección Xeneral d’Empléu y Formación, tramitáronse yá un total de 4.550, qu’afecten a 16.564 persones. Nuna xunta colos axentes sociales y económicos, el director xeneral d’Empléu y Formación, Pedro Fernández-Raigoso, destacó la elevada cifra d’ERTE tramitaos. «Ponse de manifiestu’l compromisu de l’Alministración pa entainar la xestión de los miles de solicitúes recibíes”.
No que cinca a los ERTE tramitaos, 4.407 respuenden a causes de fuerza mayor (el 96,85 %) y impliquen a 15.821 trabayadores. Otros 143 débense a causes económiques, técniques, productives y organizatives y afecten a 783 emplegaos. Pa los primeros, el númberu de díes de suspensión por promediu ye de 30, el mesmu periodu marcáu pal estáu d’alarma. Pal restu, ye de 90 díes.
Los sectores más afectaos son hostelería y hotelería, peluqueríes y pequeñu comerciu. Tres les primeres selmanes d’estáu d’alarma y de paralización de bona parte de l’actividá económica, la Dirección Xeneral d’Empléu y Formación detectó un menor ritmu de presentación d’ERTE. Asina, el pasáu 31 de marzu’l cómputu global yera de 9.170 espedientes, frente a los 9.975 actuales.
