La conseyera d’Educación, Lydia Espina, refugó’l xueves pasáu na comisión parlamentaria d’Educación de la Xunta Xeneral del Principáu d’Asturies la posibilidá de renovar la convocatoria del Plan Pilotu esperimental de Promoción del Usu del Asturianu puestu en marcha en seis centros pol Executivu autonómicu durante los cursos académicos 2017-2018 y 2018-2019. Iniciativa pol Asturianu llamenta esta falta de voluntá de los responsables de la Conseyería d’Educación por recuperar esti plan a costu cero pa la normalización y la presencia digna del idioma en diferentes escueles.
La organización recuerda que la puesta en marcha d’esi Plan Pilotu nun requixo más recursos educativos y económicos pa la so realización. Dalcordies colos datos del Gobiernu del Principáu d’Asturies, el 83,6% de les families que participaron nel plan nel cursu 2017/2018 recomendaríen la participación nel programa. D’igual manera, un 41,59% de los estudiantes meyoraron los resultaos na asignatura cursada n’asturianu y el y un 42,57% caltuvo les calificaciones.
Iniciativa pol Asturianu ñega que la falta d’oficialidá suponga un impedimentu pa la realización del Plan Pilotu y recuerda que nesi momentu’l Partíu Popular d’Asturies interpunxo una demanda que foi desestimada pola xusticia. Poro, la falta del reconocimientu d’oficialidá nun ye un argumentu válidu pa torgar la continuidá d’esta esperiencia educativa onde l’asturianu yera vehicular y de manera voluntaria.
L’asociación insiste en que nun se puede esconder la poca ambición na política llingüística y educativa na ausencia del estatus d’oficialidá del asturianu y del eonaviegu.
