Iniciativa pol Asturianu reclama la recuperación de la versión n’asturianu de la páxina web del Conceyu de Xixón. Asina lo va treslladar esti martes nel Conseyu Asesor de la Llingua. El portal nuevu estrenóse en xunu del añu pasáu y dende entós namás cunta con versión n’español, magar que munchos de los conteníos yá fueron tornaos al asturianu.

La organización, al traviés del so presidente y representante del colectivu nel muérganu, Iván Llera, anunció que “vamos reclamar nel Conseyu Asesor de Xixón una solución pa que la llingua asturiana torne a tener presencia na web del Conceyu de Xixón». «Nun tien xustificación qu’un añu depués de la presentación del nuevu portal l’asturianu siga ensin tener presencia dala”, llamentó, al tiempu qu’esplicó que «la Oficina de Normalización lleva meses tornando conteníos que depués nun se suben a la web, quedando munchos d’ellos desactualizaos».

La presencia del asturianu na páxina web municipal ye un mandatu recoyíu nel Plan de Normalización Llingüística pal periodu 2020-2023. El puntu 16 del documentu, aprobáu por mayoría nel Plenu municipal d’agostu, apunta a “emplegar l’asturianu nos conteníos institucionales de la nueva páxina web municipal xunto col castellanu, teniendo d’equiparar pasu ente pasu los demás conteníos, asina como los de les empreses municipales”. Tampoco se ta faciendo usu del dominiu xixon.es, qu’un añu depués, sigue redireccionando a la versión vieya de la web.

Iniciativa pol Asturianu reclama un esfuerciu por parte de la municipalidá pa dar cumplimiento a lo recoyío nel Plan de Normalización ya incorporar de manera urxente l’asturianu a la web del Conceyu.