Varies alumnes de la especialidá d’asturianu del Máster de Profesoráu de la Unviersidá d’Uvieú denunciaron la discriminación qu’a lo llargo d’estos meses lleven sofriendo por parte del equipu docente únicamente por faer usu de la llingua asturiana na so formación.
Dende l’entamu del cursu académicu les amenaces del profesoráu tán siendo continues: “si hacéis lo trabajos en asturiano, corréis el riesgo de tener una nota más baja porque no os puedo entender”, “si presentáis trabajos en asturiano, es posible que no se os corrijan”, “el examen ha de realizarse en castellano”. Amás, dende la Coordinación del Máster, dióse-y al profesoráu la directriz de que nun s’almitiere nengún trabayu fechu n’asturianu “por ser el español la lengua vehicular de la titulación”.
El pasáu 14 de xineru, el decanu convocó a les estudiantes xunto a les dos coordinadores del máster a una reunión nel aula de convivencia. Nel conceyu, el másimu responsable de la Facultá llegó a dicir que si siguíen cola mesma actitú, pal siguiente añu podríen desaparecer places de la Especialidá d’Asturianu nel máster.
Va dos selmanes, les alumnes recibieron otru corréu onde una profesora, dixo testualmente que “se veía en la obligación de solicitarnos la repetición del trabajo correspondiente a los temas 4/5 porque, siguiendo las directrices de la coordinación del Máster, todas las pruebas deben presentarse en el idioma de verificación del título”.
Iniciativa pol Asturianu sofita la denuncia de les estudiantes y llamenta toles trabes que tan sufriendo por querer utililizar l’asturianu. L’asociación recuerda que’l puntu 2 del artículu 7 de los nuevos Estatutos de la Universidá d’Uviéu, aprobaos n’avientu de 2024, recueye que “La lengua asturiana será objeto de estudio, enseñanza e investigación en los ámbitos que correspondan. Asimismo, su uso tendrá el tratamiento que establezcan el Estatuto de Autonomía y la legislación complementaria, garantizándose la no discriminación de quien la emplee”. La Llei d’Usu y Promoción del Asturianu nel so artículu 4 ampara l’usu del idioma y reconoz el drechu a emplegalu de pallabra y por escrito.
La organización de reivindicación llingüística reclama una postura contundente del rector Ignacio Villaverde d’alcuerdu colo que recueye l’ordenamientu internu de la institución universitaria. La entidá considera que la Universidá d’Uviéu nun puede amparar más discriminaciones llingüístiques.
