El Conceyu de Xixón remató los trabayos d’entrampiu pal control del avispón asiáticu. La Conceyalía de Mediu Ambiente y Movilidá instaló un total de 250 trampes nos principales parques de la ciudá, nos ríos Pilón y Piles, principales zones d’accesu de l’aviespa al cascu urbanu, y nes árees calientes de Somió y Deva. Nestes dos zones retiróse l’añu pasáu un importante númberu de niales.
Les trampes fueron instalaes ente’l 31 de marzu y el 3 d’abril, y tán rexistraes na aplicación web y móvil del Principáu d’Asturies, AvisAp. Amás, el pasáu sábadu empecipióse la primer revisión, que va concluyir mientres los próximos díes. Esti procesu va repitise cada quincena un total de siete vegaes.
El contratu establez amás la retirada y neutralización de 150 niales yá construyíos, ente los meses de mayu y avientu, y la impartición d’acciones de formación y divulgación sobro la especie pa personal municipal y asociaciones vecinales y medioambientales. La Conceyalía ta promoviendo la participación d’asociaciones vecinales y apícoles nel allugamientu de trampes en finques privaes de la zona rural.
