Izquierda Xunida rexistró güei una Proposición non de Llei por que se ellabore un protocolu d’actuación énte fenómenos meteorolóxicos estremos nel ámbitu educativu. L’oxetivu, minimizar l’impactu de situaciones adverses, calteniendo la integridá y la seguridá d’alumnáu y profesoráu, ensin que se vea amenorgáu’l derechu a la educación en tales circunstancies. Pa la vocera de la formación, Ángela Vallina, ye necesario apostar pola prevención al igual que yá se ta faciendo n’otres comunidaes autónomes: «Andalucía o Canaries yá cunten con esti tipu de protocolos y creemos que ye necesario que tamién Asturies apruebe una ferramienta d’esti tipu que que va facilitar la toma de decisiones en momentos que pueden derivase de foles de fríu intenso, como les rexistraes nestos últimos díes, pero tamién de fenómenos contrarios pero igualmente peligrosos como pue ser una fola de calor».
El protocolu d’intervención, según esplícase na esposición de motivos, supón cuntar con un plan d’acción orientado a menguar el marxe d’erru en tomes de decisiones énte una situación qu’afecte a la salú de los miembros de la comunidá educativa. Esi plan tien de prever la preparación de posibles intervenciones y asignar xeres específiques a quien tienen la responsabilidá de curiar de tola comunidá y, cuantimás, del alumnáu.
Los centros docentes yá tán sometíos a normes que pretenden salvaguardar la seguridá ya integridá de les persones que trabayen o estudien nellos pero, pa prevenir determinaes circunstancies, tamién resulta necesariu complementar eses normes con protocolos que prevean y antemanen pautes qu’apurran organización y unidá d’acción frente a les continxencies, conociendo les condiciones de los edificios ya instalaciones de los que disponen y planiando afechiscamente’l so Plan de Autoprotección.
