El voceru municipal d’Izquierda Xunida nel Conceyu de Xixón, Javier Suárez Llana, va pidir nel Plenu del próximu miércoles “activar yá” la participación política, social y vecinal nel diseñu urbanísticu de Naval Xixón. “Resueltu’l discutiniu cola Autoridá Portuaria sobre la titularidá de la franxa mariniega, y a puntu d’axudicase la redacción del Plan Especial de Reforma Interior, ye’l momentu de poner en marcha un procesu que garantice una participación real nel diseñu tanto del polu d’economía azul como de los espacios públicos d’usu llibre que se van a xenerar”, defende Suárez Llana.
Nesti sentíu, el conceyal d’IX recuerda que yá en septiembre de 2023 el Gobiernu municipal aceptó un ruegu de la so formación p’involucrar a grupos políticos, asociaciones vecinales y axentes sociales nel desenvolvimientu del proyectu. “Recordólo la mesma alcaldesa énte’l Conseyu Social el 16 de mayu, comprometiéndose a cumplilo, y creemos que ye’l momentu. En cuestión de selmanes empecipiará la redacción del PERI que va ordenar tol ámbitu, y cualquier idea que nun apaeza recoyida nesi documentu va ser tanto como que nunca se propunxo”.
Poro, el voceru d’IX plantega la creación d’una comisión d’estudiu venceyada a la tramitación del PERI, con participación de grupos políticos, axentes sociales y movimientu vecinal, y con tresparencia nos sos trabayos. “Y tamién abiertu a les aportaciones d’otres instituciones con trayectoria n’árees d’investigación y conocencia rellacionaes col mar y con actividá na ciudá, como la Universidá d’Uviéu, l’Acuariu o l’Oceanográficu”.
Suárez Llana defende que “proyectos de rexeneración urbana y granible como esti nun pueden facese solo dende’l Gobiernu; tienen d’integrar una visión plural de la ciudá”. El conceyal d’IX recuerda tamién que “sigue pendiente la compra de los terrenes de PYMAR pa completar el proyectu, y que l’interés d’Indra en disponer d’espaciu en Naval Xixón implicaría tener que modificar les actividaes previstes primeramente pal ámbitu, qu’anguaño se llenden a la economía azul. Son munches les decisiones a tomar que van definir el futuru d’esa zona de la ciudá, y dende’l nuesu puntu de vista tienen de tomase dende la participación y aspirando al máximu consensu”.
