José Alberto quier «recuperar sensaciones»

L'entrenador del Sporting asegura que "esti proyectu nun tien duldes"

0
693
José Alberto. / Chus Monteserín (Real Sporting)
José Alberto. / Chus Monteserín (Real Sporting)

José Alberto caltien l’enfotu en tolo alto. Espera que’l trabayu diariu del Sporting s’espeye’l sábadu nel Martínez Valero: «Tenemos una bona oportunidá pa recuperar sensaciones». Nun piensa en Nino. Tampoco nos antecedentes para los roxiblancos nel campu ilicitanu. Recordó’l so debú en Los Cármenes, «onde tampoco ganábemos». Lo que tien claro ye que nun quier que se repitan los dos últimos alcuentros.

«Entiendo que lo importante son les resultancies y agora tamos n’una situación de necesidá», espunxo’l técnicu roxiblancu, qu’aportunó en que «los dos últimos partíos tán llueñe de lo que ye esti equipu». Sabe de los erros cometíos y defende que se trata d’ameyorar, de que «toos xubamos el nuesu nivel».

Ta convencíu de que «a la fin vamos tar enriba». Nun mira la clasificación, quier dexalo pal final: «Pa mi esti proyectu nun tien duldes; creo nel mio equipu, nel trabayu que faemos y nel mio cuerpu técnicu», anque ye consciente de que cunten les resultancies, que «son dinámiques, y para salir d’una racha negativa nun hai más que ganar».