La nueche yera fría y poco enantes de l’apertura de puertes entamaba a llover en Xixón. Sicasí, lo asocedío na Sala Acapulco nun defraudó a naide. La cita yera la sesta vez que Kaotiko xubía a los escenarios pa presentar XX5, un trabayu que revisita los cantares más conocíos de la banda orixinaria d’Euskalherria.
Enantes de que los vascos xubieren al escenariu, unos sorprendentes Endemia, banda invitada procedente de Costa Rica, fueron caleciendo l’ambiente de la sala col so hardcore punk nuna cita que yera la última pa ellos acompañando a Kaotiko. 45 minutos nos qu’amosaron un soníu limpiu con lletres de tou tipu, inclusive un cantar que tien una rellación estrecha con Desakato, la banda de Llanera que marcó un enantes y un dempués na escena del punk-rock.
Tres d’ello, foi’l momentu qu’esperaba’l públicu. Kaotiko salió al escenariu p’amosar por qué lleven 25 años llevando la so música per tolos llaos. Un conciertu de casi dos hores nes que sonaron los himnos d’una banda nel que nun faltaron grandes ésitos, como «Juerga», «Otra noche», «Rico Deprimido», «No me haces bien» o «Preso 2023».
Kaotiko sigue agora la xira XX5 per otres ciudaes, como Ponferrada Vigo, Toledo y Valladolid enantes de qu’aporte’l branu, momentu nel que van xirar pelos festivales más importantes del estáu español.
