La 36ª Gala del Deporte Asturianu, que va celebrase’l 1 de payares nel Auditoriu José Barrera de Pravia, va añedir nesta edición dos reconocencies especiales: el troféu a la Superación, pa Pelayo Novo, exfutbolista del Real Uviéu; y el premiu Rey Pelayo pa Enzo Ferrero, exfutbolista del Sporting de Xixón.
La directora xeneral de Deporte, Beatriz Álvarez Mesa, presentó güei la gala, que vuelve a celebrase tras cancelase nel 2020 por mor del andanciu. Cola eleición de Pravia como sede, reconozse’l trabayu de la llocalidá, elexida Villa Europea del Deporte.
Tres un añu y medio marcáu pola crisis sanitaria, tiempu nel que l’actividá deportiva quedó paralizada dafechu, l’Asociación de la Prensa Deportiva del Principáu, en consensu cola Dirección Xeneral de Deportes, va entregar los galardones correspondientes a 2019 y el Premiu al Meyor Deportista de 2020.
Álvarez Mesa anunció dalgunes novedaes na gala, que va incluyir dos reconocencies especiales. El primeru d’ellos, el Troféu a la Superación pa Pelayo Novo, exfutbolista del Real Uviéu y de los clubes Elche, Córdoba, Lugo y Albacete, quien, tres sufrir un grave accidente, dio muestres de la su voluntá de vencer obstáculos al continuar vinculáu al deporte entrenando y compitiendo nel campeonatu nacional de tenis en silla de ruedes.
El segundu d’ellos, el Troféu Rey Pelayo, va entregase a Enzo Ferrero, futbolista ñacíu en Buenos Aires y xugador del Boca Juniors que llegó a Xixón pa defender la camiseta del Sporting en Primera y Segunda División y convirtió Asturies na so casa.
A esta dómina de premiaos hai qu’añedir al pilotu Fernando Alonso, designáu Meyor Deportista de 2019, y al xugador de balonmanu Raúl Entrerríos, capitán de la Selección Española, reconocíu Meyor Deportista Asturianu de 2020.
El restu de galardonaos y nominaos d’esta gala son Aida Nuño (ciclismu), primer accésit; Toni Pérez (hockey), segundu accésit; David Villa (fútbol), trayectoria deportiva; Marcelino García Toral (fútbol), meyor técnicu, y Jesús Rodrigo (ciclismu), valores humanos.
Nel apartáu de clubes van recibir distinciones Cosa Nuesa (discapacidá), Club Patín Mieres y Grupo Covadonga, mientres qu’Automovilismu, Surf y Baloncestu van ser premiaes como federaciones. Aroa Silva (natación), Félix González (pádel) ya Iván Cantero (golf) van selo nel capítulu de promeses; Adrián Morán, David Naredo ya Iván Rivas, nel deporte autóctonu; David Fernández, Israel Blanco y Sergio Vaquero, nel deporte adaptáu, y Alonso Meana (baloncestu), Bárbara Camblor (atletismu) y Kasandra Sylla (rugby), como meyores deportistes Universitarios. Los ganadores, d’ente los trés nominaos en cada categoría, van dar a conocese mientres la ceremonia.
La directora general tuvo acompañada na presentación por David Álvarez, alcalde de Pravia, y por Iñigo Domínguez, presidente de l’Asociación de la Prensa Deportiva del Principáu, que promueve y organiza la gala xunto col Gobiernu d’Asturies.
