La espera foi llarga pero, esti sábadu 1 de xunetu la pequeña localidá asturiana de La Pola
Somiedu va cimblar de nuevu cola celebración de la novena edición del EDP DesafiOSOmiedo. 800 deportistes van llegar hasta’l conceyu somedanu dispuestos a esfrutar de les novedaes plantegaes pola organización. Aventuries Sports, empresa organizadora del eventu, apostó por una vuelta a los oríxenes de la prueba, recuperando l’espíritu col que nació fai una década EDP DesafiOSOmiedo. Eso sí, van introducise dellos cambeos sobro’l trazáu en busca de minimizar l’impactu ambiental. Recórtas’l percorríu del ultra pa evitar el pasu per zones especialmente sensibles.
La prueba va constar de 3 distancies ( 24 la SDS , 46 la MDS y 70 km la UTDS) y vuélvese a disputar nuna solo xornada. Los llagos del Val.le y de Saliencia, la crestería de los Bígaros, les brañes de Mumián, Sousas, La Mesa y restu de llugares paradisiacos del relieve asturianu por onde escurren les carreres van facer el prestu de los corredores que mientres unes hores van tener el privilexu de competir en toa una Reserva de la Biosfera.
El EDP DesafiOSOmiedo va axuntar a un gran elencu de corredores ente los que destaca la presencia de Manuel Merillas y Ohiana Kortazar. Ganadores ambos en 2014 y 15 respectivamente vuelven col enfotu de esfrutar del monte y revalidar títulu ( SDS Manu y MDS Ohiana) Tampoco quieren perdese esta gran fiesta del deporte atleta como Borja Fernández o Claudia Lueje, ( recién ganadora en Trevesera), Álvaro González o’l navetu Bruno Argüelles, y de xacíu los defensores del títulu de la UTDS 22 ( Alberto Fernández Palaciu y Fabiola Arévalo).
Un completu programa que va enllenar Somiedu d’ambiente’l vienres y el sábadu próximos.
La recepción de participantes con una sidra asturiana el vienres a les 17.00 h va dar el pistoletazu de salida a una completa fin de selmana de trail. A les 20:00h del vienres na Casa del Parque va tener llugar la charra técnica y zarru de xornada a la espera del sábadu de competición.
