Un 23 d’abril de 1847 alcordóse na casa conceyu de Xixón el nome d’una de les cais más conocíes de la ciudá. Sicasí, esa cai lleva dende entós con un mal nome. Ye la cai Cabrales y esta ye la so hestoria.
Juan Nepomuceno Cabranes dexó al Conceyu (testamentu del día 19 de febreru de 1836) la metá de los sos bienes, con destín al Hospital de la Caridá, al que la so xunta pertenecía, y que tuvo asitiáu, hasta cien años dempués, nos actuales xardinos del Náuticu. Los bienes donaos por Cabranes fueron 15.000 reales, l’edificiu destináu a hospital y delles cases na cai que depués llevó’l so nome. Esi día de 1847 decidió llamase Cabrales a la cai. Anque, en concencia, l’apellíu de Juan Nepomuceno ye Cabranes y non Cabrales, y asina figura nes sos partíes de nacencia y de fallecimientu.
L’erru vien yá dende 1847, cuando’l Conceyu llama Cabrales a una cai que se conocía popularmente como Cabranes. La impresión que da ye que nin siquier los descendientes de Juan Nepomuceno trataron d’iguar la equivocación.
El 17 d’agostu de 1891, el Conceyu impon el nome de Cabrales a la unión de trés antigües cais: Rectoría, Villaviciosa y la que yá se llamaba asina dende 1847. Rectoría por cuenta d’una popular vivienda del párrocu, o rectoral, que se baltó en 1902. La cai Villaviciosa yera perpendicular a la conocida como carretera de Villaviciosa. Yera un tramu de Cabrales que na actualidá asitiaríamos ente la ilesia de San Llorienzo y l’avenida de la Costa, y que perdió’l so nome pa tresformase, xunto a Villamanín, Rectoría y el tramu conocíu como Cabrales, nuna llarga cai: Cabrales.
