El tráficu rodáu al real sitiu de Cuadonga vuelve empecipiar el vienres 5 de xunu a les 21:00 hores. L’accesu a la basílica dende la glorieta del Pelegrín ta cortáu dende principios de mayu poles obres d’acondicionamientu de la escampada. El tránsitu piatonal caltiense abiertu. En principiu, la Conseyería d’Infraestructures previera caltener el corte hasta’l vienres, 29 de mayu. Sicasí, viose obligada a ampliar el zarru del vial pola demoranza de la llegada de material provocáu pola declaración del Estáu d’Alarma.
Los trabayos na escampada de Cuadonga paralizaronse namás mientres el parón de quince díes nel sector na Selmana Santa. Pa concluyir les obres, queden dellos remates pendientes que convién realizar ensin circulación pa caltener el rendimientu de les actuaciones.
La conseyería empecipió l’acondicionamientu a principios de payares de 2019. La obra supón una inversión de 433.277 euros. Los trabayos consisten na reposición del pavimentu en males condiciones dende la plaza de la basílica hasta l’entamu del accesu piatonal a la Santa Cueva, incluyendo la zona de rodadura, la vía sacra y los aparcamientos asitiaos frente a les cases de los canónigos. Nestos llabores, utilícense los mesmos materiales qu’esisten na actualidá, sacante na zona de tremáu asfálticu frente a les cases de los canónigos, que se va sustituyir por piedra caliar Griotte.
