La Federación Europea del Camín de Santiago anunció l’aplazamientu hasta la seronda de la celebración del Día Européu del Camín de Santiago. Esta efeméride, prevista pa la segunda fin de selmana de mayu, queda aplazada de resultes de la crisis sanitaria provocada pol COVID-19. La decisión tomóse nuna xunta técnica desenvuelta al traviés de videoconferencia. Nella participó’l director xeneral de Cultura y Patrimoniu, Pablo León, xunto a representantes de ciudaes y rexones de Portugal, España, Francia, Países Baxos, Bélxica, Polonia, Italia y Lituania.
La iniciativa d’esta celebración surdió l’añu pasáu tres una propuesta realizada por Asturies. La primer edición tuvo llugar n’ochobre, cola organización de más de 50 eventos simultáneos en distintos países europeos. Ente les actividaes, incluyéronse visites guiaes por distintos tramos de la ruta xacobea y espectáculos musicales y escénicos.
Amás d’analizar la situación del Camín de Santiago nel contestu de la crisis sanitaria, na xunta encaróse l’empiezu del procesu de reforzamientu internu de la Federación Europea. La intención ye reorganizar el so funcionamientu y impulsar la so actividá en víspores de la celebración en 2021 del próximu Añu Santu Xacobéu y del décimu aniversariu de la mesma organización. Esta fundación europea ye l’organismu que xestiona’l Camín de Santiago en cuantes qu’Itinerariu Cultural Européu énte la UE. Tamién ye la entidá responsable de garantizar la visibilidá afayadiza de la ruta a nivel continental, impulsando programes y proyectos d’estudiu, espardimientu y divulgación del itinerariu.
