El llema d’estes Xornaes de marzu ye «Puxa la llucha de les muyeres» y la conceyala d’Igualdá y Feminismu, Nuria Ordóñez Martín, esplicó que’l cartelu ye inclusivu una y bones esta llucha ye la de toes y toos, muyeres y homes de toles edaes y tamién destacó la imaxe d’una lloba que, frente al calter peyorativu que delles vegaes dar a la palabra, simboliza a la muyer guerrera y lluchadora.
Les actividaes de marzu en Mieres van allargase hasta abril, cuando se va poner en marcha na Casa de les Muyeres el taller Martes de Mindfulness, impartíu por Samikannu Peter. Va ser tolos martes del mes d’abril coles mires d’amenorgar l’estrés y la carga mental. Les inscripciones pa estos talleres son gratuites y van poder faese dende’l 15 de marzu.
