La Conseyería d’Educación empezó a impartir güei formación específica a más de 400 docentes pal nuevu perfil de coordinación de bienestar y protección del alumnáu, que va velar pola óptima convivencia nos centros d’enseñanza.
El director xeneral d’Ordenación, Evaluación y Equidad Educativa, David Artime, inauguró en Siero les Xornaes formatives de coordinadores/ye de bienestar y protección del alumnáu, que van tener continuidá los díes 16 y 23 de payares. Estes sesiones escuerren dar a conocer esti novedosu perfil del sistema educativu y la lexislación que la sofita y la so función nos centros. Nuna segunda fase, va impartise formación temática.
La figura del coordinador o coordinadora de bienestar y protección nos centros escolares ta recoyida na Llei Orgánica 8/2021, de 4 de xunu, de Protección Integral a la Infancia y l’Adolescencia frente a la Violencia, aprobada en xunu de 2021. Malapenes un mes dempués de que se promulgara, Educación incluyó na circular d’entamu del cursu 2021-2022 les dos directrices básiques en materia educativa: la creación d’esi perfil en tolos centros públicos, alcordaos y privaos, según los protocolos d’actuación.
Aquella circular contemplaba la designación d’un docente del claustru pa desempeñar esa xera protectora del alumnáu y establecía que la persona escoyida dispunxera d’una hora complementaria. Sicasí, col enfotu de potenciar entá más esa figura ya implicar al profesoráu, la circular del cursu actual tresformó esa hora complementaria inicial nuna hora lectiva.
Asturies foi pionera na implantación d’esta nueva figura, polo que’l Ministeriu de Derechos Sociales y Axenda 2030 convidó en septiembre a la conseyera d’Educación, Lydia Espina, a esponer en Madrid la esperiencia autonómica.
El profesoráu asturianu lleva dellos años trabayando en planes de convivencia, polo qu’esiste una base p’avanzar nel llabor desenvueltu polos casi 400 coordinadores y coordinadores nomaos l’añu pasáu. Munchos ellaboraron planes individuales de los centros, pero otros tuvieron una visión más amplia, al preparar planes comarcales qu’impliquen a dellos equipamientos y conceyos.
Pela so parte, l’Observatoriu Estatal de Convivencia Escolar, dependiente del Ministeriu d’Educación y Formación Profesional, acaba de presentar una guía sobre esta figura de coordinación. Amás, aprobó un reglamentu y encamientos sobre la ciberconvivencia. Nesi órganu tán representaes toles comunidaes y los sindicatos.
