La Encuesta de Población Activa (EPA) del cuartu trimestre de 2021 confirma la intensa recuperación del empléu y asitia Asturies, per primer vegada, como la comunidá cola tasa de paru más baxa d’España (10,43%) ente mozos menores de 25 años. La EPA, publicada esta mañana pol Institutu Nacional d’Estadística (INE), confirma la recuperación de l’actividá económica y de la ocupación nel Principáu.
Asturies zarró 2021 con 44.100 paraos, un 26,52% menos qu’en 2020 (-11.800 paraos), que l’asitien como la segunda comunidá autónoma col mayor descensu d’España. La tasa de paru cai a un nivel históricu del 10,1%, más de trés puntos porcentuales per debaxo de la media nacional (13,50%), que faen del Principáu unu de los territorios con menor incidencia del desempléu xuntu con País Vascu (8,43%), Aragón (9,02%) y Navarra (9,93%).
Como yá adelantraren les cifres de paru rexistráu, destaca la positiva evolución ente los menores de 25 años, unos de los colectivos prioritarios nes polítiques diseñaes pol Gobiernu rexonal. Asina, la tasa de paru xuvenil asítiase nel 10,43%, trés vegaes menor que la media nacional (30,70%) y, per vegada primera, la más baxa d’España. En 2020 la tasa yera del 37,49% y llegó a asitiase nel 63,57% en 2013, nos peores momentos de l’anterior crisis.
Tamién destaquen los niveles de desempléu sectoriales sobre manera na industria, con un mínimu históricu de 1.000 paraos frente a los 61.100 del cuartu trimestre de 2020, lo que supon un descensu del 83,60% nel últimu añu.
En cuanto al empléu, la EPA estima xuna ocupación n’Asturies de 396.500 persones, lo que supon recuperar los niveles del tercer trimestre de 2017, bien anteriores a la pandemia sanitaria. Nel últimu añu creáronse n’Asturies 11.800 puestos de trabayu.
Pilar Varela, xerente del Serviciu Públicu d’Empléu (Sepepa) valora positivamente los datos de la Encuesta de Población que, al so xuiciu, van na mesma llinia que los datos mensuales del paru rexistráu y confirmen qu’Asturies sigue calteniendo una evolución más positiva que la media nacional.
