La Conseyería d’Educación va estrenar el próximu cursu 2026-2027 un ciclu formativu de grau cimeru d’Artes Plástiques y Diseñu de Cómic, que se va impartir na Escuela d’Arte d’Uviéu. Asturies va convertise na primer comunidá del noroeste del país n’ufiertar esta nueva titulación de técnicu cimeru nun centru públicu.
Esti ciclu, que pertenez a la familia profesional de Comunicación Gráfica y Audiovisual, va tener una duración de dos mil hores y va constar de 21 módulos. El primer cursu comparte programación col ciclu de grau cimeru d’Artes Plástiques y Diseñu d’Ilustración, que yá s’estudia nesti centru con gran aceptación.
La nueva formación va empezar en septiembre col cursu 1.u y una ufierta de quince places. Con calter xeneral, les persones aspirantes tendrán de tener el títulu de Bachilleratu o equivalente, amás de realizar una prueba específica d’accesu.
Sicasí, van quedar exentos d’esa prueba preliminar los titulaos en Bachilleratu na modalidá d’Artístiques. Tamién puen aportar de forma directa los técnicos (cimeros) d’Artes Plástiques y Diseñu y los titulaos n’enseñances artístiques cimeres o enseñances universitaries nes siguientes disciplines: Artes Plástiques, Diseñu, Caltenimientu y Restauración de Bienes Culturales, Belles artes, Arquitectura y Inxeniería Técnica en Diseñu Industrial.
A lo último, esiste una vía d’accesu directu al nuevu grau p’aquellos titulaos en Bachilleratu o equivalente qu’acrediten una esperiencia llaboral de, a lo menos, un añu rellacionada coles competencies profesionales oxetu d’esti ciclu.
