La flota asturiana va disponer d’un 71% más de cuota de xarda que l’añu pasáu

La medra na capacidá de pesca d'esta especie ye ún de los mayores rexistraos dende 2014

0
454
Cuota de la xarda n'Asturies

La nueva repartida de les cuotes adicionales provenientes de los intercambios ente especies con otros países de la Unión Europea (swaps) va incrementar la capacidá pesquera de la xarda un 71% respectu al total asignáu en 2019. D’esta miente, la flota asturiana va disponer de 2.083.339 quilos, una de les mayores cantidaes dende 2014.

La Secretaría Xeneral de Pesca del Ministeriu treslladó a les comunidaes del Cantábricu Noroeste un borrador de la propuesta de resolución que va tar abiertu a allegamientos hasta’l 7 d’abril. El documentu recueye les reparties de los swaps tomando en consideración el criterio de calter socioeconómicu y de dependencia de la flota, tal que reivindicaba’l Principáu.

El Gobiernu d’España llogró de los intercambios ente especies con otros países europeos 1.700.000 quilos. El 60% d’esa cantidá ye’l que se va partir teniendo en cuenta criterios como’l númberu de buques, mesmo que la so eslora y capacidá de propulsión, lo qu’atiende a les continues demandes del sector pesqueru asturianu.

La flota rexonal tenía primeramente asignaos pa la campaña d’anguaño 1.796.190 quilos de xarda, a los que se van añedir 287.149 más, n’oficializándose la repartida de los swaps. Esta cantidá supón una importante medra, yá que colos criterios de repartida d’años anteriores la flota asturiana solo llograra 92.000 quilos de los 1.700.000 xeneraos polos intercambios con otros países. En concreto, l’añu pasáu, dispunxo d’últimes de 1.217.785 quilos.