La Conseyería d’Educación rexistra la cifra más alta de los últimos años d’alumnáu de Llingua Asturiana y Lliteratura. El cursu 2024-2025 empezó con 22.909 estudiantes, lo que supon un crecimientu del 1,2% respectu al añu pasáu. Amás, a esta cantidá súmense otres 31 matrícules contabilizaes mientres el primer trimestre.
Nel apartáu normativu, la gran novedá va producise en septiembre, coincidiendo col entamu del próximu cursu escolar, cola introducción de la enseñanza d’asturianu y eonaviegu en tol segundu ciclu d’Infantil (3 a 6 años). Esa iniciativa va suponer la creación d’un centenar de nueves places de docentes.
Esti novedosu acercamientu al asturianu va realizase en Comunicación y representación de la realidá, una de les trés árees d’aprendizaxe esistentes nesa etapa educativa. Va tener un calter voluntariu pal alumnáu -tal que preve la Llei 1/1998, de 23 de marzu, d’usu y promoción del asturianu-, magar tolos centros qu’impartan el segundu ciclu d’Infantil van tar obligaos a ufiertalo.
Espina anunció que’l cambéu del decretu d’Infantil pa incluyir esti conteníu yá cunta con un borrador, que va salir llueu a información pública.
Tamién esiste una propuesta de cambéu d’otru decretu pa ufiertar el próximu cursu l’asturianu nes Escueles Oficiales d’Idiomes. “Les persones interesaes van poder llograr la mesma certificación de llingua asturiana que se vien concediendo dende 2020 coles pruebes llibres, pero cola ventaya de qu’agora van recibir la formación necesaria pa consiguila”, apuntó la conseyera.
