La SEDLL entama los díes 23, 24 y 25 próximos el so añal congresu internacional que se va celebrar na Facultá de Formación del Profesoráu y Educación de la Universidá d’Uviéu y que cunta cola collaboración, tantu de la citada facultá, como del Departamentu de Ciencies de la Educación. A lo llargo de los trés díes, un total de 200 espertos en didáctica de les llingües d’universidaes españoles, iberoamericanes y europees van esponer los sos puntos de vista sobre’l tratamientu escolar qu’han de tener, respectivamente, la llingua estatal, la estranxera y, nel so casu, la llingua rexonal.
El lema central de les xornaes lleva por títulu: “Educación Llingüística y Lliteraria Integral, Innovación y Proyectos de Centru”. Trátase d’una temática especialmente oportuna nos
momentos nos que la nueva llei educativa, la LOMLOE, ponse en práctica nes etapes d’Educación Infantil, Primaria y Secundaria. La inauguración del congresu va tener llugar el miércoles, 23, a les 11.30 h. y va cuntar cola presencia de Lydia Espina (Conseyera d’Educación del Gobiernu del Principáu d’Asturies), Josep Ballester (Presidente de la SEDLL), Marcelino Fernández-Raigoso (representante de la Universidá d’Uviéu) y Xosé Antón González Riaño (Presidente del Comité Organizador).
