Les bicicletes y los patinetes eléctricos ganen espaciu na desescalada. El Conceyu de Xixón va priorizar la movilidá urbana a pie y en bici nel plan de transición hacia una «nueva normalidá». El conceyal de Mediu Ambiente y Movilidá, Aurelio Martín, presentó nuna rueda de prensa telemática un primer conxuntu d’actuaciones “de rápida execución y baxu costu, que busquen afaer la nuesa ciudá a la nueva movilidá”. Trátase de midíes que, tal como señaló’l conceyal, «encaxen perfectamente col nuesu modelu de ciudá: pacifican el tráficu y promueven una movilidá sostenible y activu».

Les actuaciones pa favorecer la movilidá ciclista inclúin la implantación de ciclo-carriles en 29 cais y aveníes coles mires de configurar corredores que dean continuidá a los carriles-bici esistentes. D’esta manera se quier promover la bicicleta como un mediu de tresporte d’usu cotidianu, y non solo venceyáu al ociu o el deporte. Los ciclo-carriles son carriles na calzada nos que les bicicletes circulen en coesistencia colos vehículos, con una velocidá máxima de 30 km/h. La so implantación va realizase por aciu señalización horizontal y vertical.

El Conceyu va reabrir amás el serviciu Xixón-Bici y va autorizar la reapertura de los servicios de bicicleta y patinete compartíos de Tucycle, con nueves condiciones. En dambos casos, les bicicletes y los patinetes van ser desinfestaos diariamente por Emulsa. Pal so usu va ser obligatoriu llevar guantes.