La ocupación hotelera medró n’abril un 3,5%

Los turistes estranxeros aumenten un 43%

0
633

Meyora la ocupación hotelera. La cifra total de viaxeros agospiaos n’establecimientos hoteleros de Xixón n’abril ye de 36.520 persones, según datos apurriós por Turismu Xixón. Medra un 3,5% respeuto al añu caberu, con incrementos importantes nel númberu de viaxeros estranxeros, que rexistren un aumentu del 43%. No tocante al númberu de nueches d’agospiu (74.855), l’incrementu ye del 13,4% respeuto al mesmu mes del añu pasáu, aumentando un 60,9% les nueches d’agospiu d’estranxeros.

La tasa d’ocupación rexistrada n’abril asítiase nel 51,0%. Poro, ye un 11,7% superior a la rexistrada n’abril del añu caberu (45,6%) y algama’l 70,9% en fines de selmana. No que cinca a la tarifa media diaria (ADR), ésta afítase en 58,03 euros (medra un 0,9%) y la rentabilidá de los establecimientos (RevPAR) ye de 34,58 euros por cuartu ya increméntase un 14,8% respeuto al añu pasáu. La fauturación del sector hotelero nel mes d’abril algama 2,6 millones d’euros, un incrementu del 12,4% respeuto al mesmu mes del añu caberu.

Acumuláu primer cuatrimestre

La cifra total de viaxeros agospiaos n’establecimientos hoteleros de Xixón nel primer cuatrimestre del añu asítiase en 116.751 persones, afitando un récor nuevu na serie hestórica. Esta cifra supón un incrementu del 1,5% respeuto al mesmu periodu de 2018. Tamién ye sorrayable l’aumentu de viaxeros estranxeros, qu’algama’l 33,1%.

No tocante al númberu de nueches d’agospiu la cifra acumulada asítiase en 215.217 nueches, afitando un máximu hestóricu nuevu. L’incrementu respeuto al mesmu periodu de 2018 ye del 4,1%. Les nueches d’agospiu xeneraes polos turistes estranxeros xuben un 23,5%.