La Oreja de Van Gogh ruempe Metrópoli nel tercer sold out del festival

La Oreja de Van Gogh abría l’escenariu principal col llexendariu ‘Cuidate’ pa dar pasu a un conciertu nel que toos y caún de los cantares fueron coriaos -de principiu a fin- por un públicu intergeneracional. El raperu, Aissa, ocupaba l’escenariu Thunder Bitch col so aclamáu ‘African Lover’ y una lexón de fans apurríos a los ritmos africanos cantaos n’español.

Un martes veraniegu nel Recintu Ferial Luis Adaro nel que se colgó’l cartelu de ‘Nun hai entraes’ una hora dempués de l’apertura de puertes y non solo pa esfrutar de los conciertos del día, tamién pa ver a Raúl Massana presentando’l so nuevu llibru para los más peques ‘¡Te vas a reir!’ o pasiar pol Market más variáu de Xixón. La organización yá anunció un nuevu ‘sold out’ nes entraes de día pa güei miércoles, 3 de xunetu, y recuerda que la única forma de consiguiles sería mercando l’abonu del festival completu. Amás, encamienten llegar, a lo menos, con dos hores y media d’antelación al recintu pa evitar coles na entrada.

Tamién, faen especial fincapié en recordar que l’accesu mientres tol festival, ye dende les 17:00h -ente selmana- hasta les 3:00h y, a partir d’esa hora, solo van aportar a Metrópoli abonaos y pulseres VIP del día en cursu y que les entraes de día son d’accesu únicu.