La Conseyería de Movilidá, Medio Ambiente y Xestión d’Emerxencies llevantó y recolocó esta mañana la estructura de la pasarela piatonal del puertu de Cuideiru, que se sometió a una anovación integral p’ameyorar la seguridá y comodidá de los usuarios. Una gran grúa llevantó la estructura, de 6,2 tonelaes de pesu, hasta asitiala na so posición orixinal.
El viceconseyeru d’Infraestructures y Movilidá Sostenible, Jorge García, y l’alcalde de Cuideiru, Carlos Valle, presenciaron parte d’estes maniobres. La pasarela instalóse esta mañana y va abrise a los peatones una vegada que les lloses de cimentación cuayaren convenientemente y se faigan les correspondientes pruebes de carga. La previsión ye que pueda tar en serviciu a principios de setiembre, si nun hai incidencies.
El Gobiernu d’Asturies invirtió más de 425.000 euros n’anovar dafechu la estructura de la pasarela, tanto’l tableru como los arcos. Les pieces treslladáronse por separáu hasta’l puertu secu de la localidá pixueta, onde s’ensamblaron. L’arreglu y anovación de la pasarela piatonal enmárcase dientro de les actuaciones de meyora y caltenimientu que’l Gobiernu d’Asturies realiza nos 24 puertos de la rede autonómica.
