Un total de 5088 estudiantes -2910 muyeres y 2178 homes- esamínense esti añu n’Asturies de la Prueba d’Evaluación de Bachilleratu pal Accesu a la Universidá (EBAU) na so convocatoria ordinaria, que se va desenvolver ente’l martes, 4 y el xueves, 6 de xunu. Esti añu inscribiéronse 319 estudiantes más que l’añu pasáu, nel que se matricularon 4769. Les pruebes van facese en 17 espacios, asitiaos n’Uviéu, Xixón, Avilés, Mieres, Llangréu, Ribeseya, Cangas, L.luarca y Tapia. Trés estudiantes van realizar la prueba nes aules universitaries del HUCA. La convocatoria de xunetu va tener llugar ente los díes 8 y 10.
Les sedes van ser estes:
Uviéu
Aulariu A – Campus d’Humanidaes.
Edificiu Departamental-Campus d’Humanidaes.
Aulariu Sur – Facultá d’Economía y Empresa.
Aulariu Norte – Facultá d’Economía y Empresa.
Aulariu de Ciencies Xurídicu-Sociales. Facultá de Derechu.
Xixón
Aulariu Sur – Campus de Xixón.
Aulariu Norte – Campus de Xixón.
Edificiu Polivalente – Campus de Xixón.
Avilés
IES Nº5.
IES Ramón Menéndez Pidal.
IES Carreño Miranda.
Mieres
Campus de Mieres. IES Bernaldo de Quirós.
Llangréu
IES Jerónimo González. Sama de Llangréu.
Oriente
IES Avelina Cerra. Ribeseya.
Suroccidente
IES Cangas del Narcea.
Occidente
IES Marqués de Casariego. Tapia.
IES Carmen y Severo Ochoa. L.luarca.
Los estudiantes de Bachilleratu tendrán qu’esaminase de les cuatro asignatures, que constituyen la fase d’accesu, cursaes en segundu de Bachilleratu según la modalidá ya itinerariu realizáu. Cada exerciciu de la fase d’accesu va calificar de 0 a 10 puntos. La calificación d’esta fase va ser la media aritmética de les calificaciones llograes en caúna de les materies, espresada nuna escala de 0 a 10 puntos con trés cifres decimales y arrondada a la milésima. Esta calificación tendrá que ser igual o superior a 4 puntos pa facer media cola calificación final del bachilleratu. La nota de la EBAU va calculase en base a un 60% de la calificación final del Bachilleratu y un 40% de la calificación de la fase d’accesu de la prueba. Va entendese qu’un estudiante axunta los requisitos d’accesu cuando’l resultáu d’esta fórmula seya igual o superior a 5 puntos. La nota máxima nesta fase ye de 10 puntos.
Aquellos estudiantes que quieran xubir nota pa poder entrar a los sos estudios universitarios tendrán que presentase amás a la fase d’almisión. Va consistir na evaluación de les materies d’opción del bloque d’asignatures troncales de segundu cursu de Bachilleratu. Les materies d’esta fase nun necesiten cursase nel Bachilleratu pa ser evaluaes na prueba y los estudiantes podrán esaminase d’un máximu de cuatro asignatures. La nota final una vegada realizaes dambes fases (accesu y almisión) va algamar un máximu de 14 puntos.
Como novedá, anguaño hai diez asignatures nueves procedentes del Bachilleratu d’Artes y del Bachilleratu Xeneral. Los estudiantes que realicen la prueba de Dibuxu Artísticu van ser distribuyíos nestos espacios: Edificiu Departamental del Campus Humanidaes (Uviéu), Edificiu Polivalente del Campus de Viesques (Xixón), IES Ramón Menéndez Pidal (Avilés), IES Bernaldo de Quirós (Mieres), IES Jerónimo González (Sama de Llangréu), IES Avelina Cerra (Ribeseya) y nel IES Carmen y Severo Ochoa (L.luarca).
