El Gobiernu dio ayeri un importante pasu na proteición del patrimoniu asturianu, cola declaración de bienes d’interés cultural (BIC) de La Quinta de la Fundación Selgas-Fagalde, na llocalidá d’El Pitu (Cuideiru), y de la colección d’arte de l’antigua Caxa d’Aforros d’Asturies (Caxastur). Esta decisión garantiza la salvaguarda y la vinculación cola comunidá de dos conxuntos artísticos mui relevantes, que inclúin obres de gran valor y d’importante trescendencia p’Asturies.
Conxuntu patrimonial de los Selgas
La Quinta de los Selgas ye ún de los conxuntos patrimoniales más valiosos d’Asturies. Ta formáu por una mansión construyida a partir de 1883, los sos xardinos históricos, la ilesia-panteón, les escueles y una destacada colección artística axuntada polos hermanos Fortunato y Ezequiel de Selgas, promotores d’importantes obres sociales na segunda metá del sieglu XIX. El so llegáu, donáu a la Fundación Selgas-Fagalde en 1991, inclúi pintures, escultures, artes decoratives y documentación.
Ente les pieces más destacaes figura’l cuadru La Anunciación de la Virxe, una obra atribuida a El Greco, declarada BIC en 2024. Trátase d’un óleu sobre llenzu de 109 x 57 centímetros que constitúi una reducción, con mínimes variantes, del que pintó l’artista cretense pa la capiya Oballe de Toledo.
El conxuntu declaru BIC ta integráu pol palaciu —que caltién en bona midida la so decoración orixinal y alluga obres de destacaos pintores y una amplia colección de mobiliariu y elementos decorativos—, los sos xardinos, el pabellón de tapices, la ilesia de Xesús Nazareno, la casa rectoral y les escueles, asina como pola colección artística, formada a partir de 1885, y el llegáu documental y bibliográficu.
La Conseyería de Cultura entamó’l procesu pa protexer el conxuntu de los Selgas en xunu de 2023. Dende entós, llogró informes favorables de la Real Academia de la Historia, del Real Institutu d’Estudios Asturianos (Ridea) y de la Real Academia de Belles Artes de San Fernando, asina como de la Comisión d’Urbanismu y Ordenación del Territoriu (CUOTA).
Colección artística de l’antigua Caxa d’Aforros d’Asturies
La colección vinculada a la Caxa d’Aforros d’Asturies constitúi ún de los exemplos más destacaos de mecenalgu artísticu desenvolvíu n’Asturies ente 1940 y la primer década del sieglu XXI. El so orixe remóntase a 1945, tres la fusión de les caxes y montes de piedá d’Uviéu y Xixón. Mientres décades, estes instituciones promovieron esposiciones itinerantes que percorreron Asturies y contribuyeron a la difusión de la creación contemporánea.
La colección, integrada por más de 1.500 obres de pintura, dibuxu y escultura, compónse mayoritariamente de pieces d’autores asturianos del sieglu XX, amás d’una selección d’artistes del XIX y de creadores de fuera de la comunidá. La so titularidá repártese ente la Fundación Bancaria Caxa d’Aforros d’Asturies y Unicaxa. La so amplitú, representatividá y relevancia como testimoniu del coleicionismu institucional merecen la máxima proteición patrimonial.
En rellación con esti espediente, l’Executivu autonómicu y Unicaxa roblaron el pasáu 5 de febreru un alcuerdu d’intenciones en virtú del cual la entidá financiera va ceder en depósitu al gobiernu les obres integraes na Colección Unicaxa, ente elles 172 que s’alcuentren anguaño fuera de la comunidá y que van tornar a Asturies nos próximos meses. El conxuntu inclúi trabayos de Joaquín Vaquero Turcios, Pablo Maojo, Antonio Suárez, Vicente Pastor, Maite Centol, Alejandro Mieres o Amado González Fabila, ente otros creadores.
