Les comprobaciones de seguridá realizaes nel funicular de Bulnes arriendes de la renovación del mandu eléctricu del remonte revelaron una incidencia nel sistema de frenáu que torga restablecer el serviciu nes debíes condiciones de seguridá mañana, vienres, tal que taba previsto.
El Gobiernu d’Asturies llamentó les molesties qu’esta circunstancia causa a los vecinos y les vecines de Bulnes, mesmo qu’a los visitantes, pero considera que la total garantía de seguridá para les persones qu’usen el funicular ye irrenunciable y en nengún casu tien de vese comprometida.
L’Executivu esixó la mayor axilidá y rigor pa resolver cuanto antes les incidencies técniques y realizar toles comprobaciones de seguridá que garanticen el serviciu pa los viaxeros. Les obres de renovación del mandu eléctricu pal control del funicular faense per primer vegada dende que’l remonte entrara en funcionamientu en 2001. La sustitución de los sistemes que gobiernen el remonte supon xuna inversión de 1.633.500 euros.
Esta actuación sustitúi y moderniza, tres más de 20 años en serviciu, los armarios de mandu y seguridá de la estación motriz, la estación inferior y los dos vehículos. Tamién, supón el cambéu de la unidá de potencia del accionamiento eléctricu y los paneles de control n’estaciones y vehículos, mesmo que los frenos del accionamientu. Amás, abórdase la instalación d’un sistema de diagnósticu remotu y la renovación de tol cableaxe de potencia de les estaciones y la fibra óptica pal sistema de comunicaciones.
