Tres meses ensin noticies, la última comunicación de la SAREB, recibida per aciu burofax el 28/10/2025, esixe un plan de pagos nel plazu de 10 díes naturales a los vecinos al grupu de vecinos a los que se-yos reclamó una delda en conceutu de rentes atrasaes desque la SAREB faíase cargu del edificiu en 2021, que xuben a 20.000 euros, baxo amenaza de «siguir coles acciones llegales que correspuendan pa resolver l’actual situación», col fin de «recuperar la posesión d’estes viviendes»:
Poro, la SAREB pon enriba de la mesa la esixencia de cobrar la delda íntegra o un plan de pagos pol cual puedan cobrar una delda que xube los 20.000 euros a cada vecín nun plazu de 10 díes.
Los vecinos reiteren, otra vuelta, los motivos polos cualos esta delda, según la so esixencia, nun tien nengún sentíu. «Nun puede cobrase al nun haber relación contractual que xustifique la xeneración d’una delda, porque nun hai contratu robláu ente los vecinos y la SAREB nin una subrogación de los mesmos. Los xulgaos, según recueye la SAREB nes sos comunicaciones, declararon inválidos los contratos, polo que nun se pueden esixir rentes d’un contratu inválidu. La relación contractual de los vecinos yera namás cola constructora, a la que sí se -y pagó les rentes mensualmente inclusive con posterioridá a la llegada de la SAREB. El Tribunal Supremu, en dos sentencies (1 de marzu de 2021 y 4 de payares de 2020), afirma qu’a los inquilinos en precariu, resultaos tres la estinción del contratu, nun se-yos pueden cobrar rentes d’un subsistente contratu. Por esta mesma razón la SAREB acota la subrogación de los contratos, pero hai qu’incidir en que ye unillateral por cuenta de que los vecinos nun han subrogado nengún contratu ufiertáu».
