El PSOE sollerta de que la sentencia de EMULSA sobre’l despidu del ex-xerente de la empresa municipal Esteban Álvarez, saca a la lluz posible delitos cometíos pol Gobiernu de Carmen Moriyón. La mesma alcaldesa nun tramitó la denuncia interna al amparu de la Llei 2/2023 sobre la protección de les persones qu’informen sobre infracciones normatives y de llucha contra la corrupción. “Yera obligación de l’alcaldesa tramitala y nun lo fixo; tenía 3 meses de plazu y el despidu produzse un día primero que venza esi plazu. Eso ye un posible delitu de prevaricación. Ye una canal de denuncia que tolos conceyos, toles Alministraciones Públiques tendríen de tener. ¿au ta denuncia? ¿au ta la canal que tien qu’esistir? ¿Por qué nun quixeron escuchar a Esteban Álvarez facilitar la información de posibles irregularidaes graves cometíes nel senu d’EMULSA? Nel nuesu Estáu de Derechu, incumplir deliberadamente una llei pa perxudicar a daquién tien un nome. ¿Van siguir saltándose la llei?” pregúntase’l conceyal del Grupu Municipal Socialista, Ramón Tuero.
Los socialistes informen de que si nun se da respuesta a toes estes cuestiones, va ser el PSOE’l que vaya a los procedimientos llegales correspondientes pa resolver les irregularidaes y Rodrigo Pintueles y Carmen Moriyón van tener qu’esplicar qué pasó con esa denuncia énte les autoridaes xudiciales.
Per otru llau, l’actual presidente de la empresa, el tamién conceyal del PP, Rodrigo Pintueles, unvió un escritu al Tribunal de Cuentes n’avientu de 2024 diciendo que’l ex-xerente nun tenía poderes. “La sentencia reconoz qu’Esteban Lázaro tenía los poderes conferíos dende’l 30 de xineru de 2023 cola facultá de representación de la empresa énte los tribunales de too orde y xurisdicción. Mentir a un Tribunal deliberadamente, y pa perxudicar una investigación, tamién tien un nome nel nuesu Códigu Penal, Sr. Pintueles. ¿Por qué nun s’apurrió al Tribunal de Cuentes les pruebes qu’Esteban Lázaro Ávarez facilitó al presidente de EMULSA con ánimu d’interferir na investigación empecipiada, y riquiendo al Tribunal que cualquier comunicación posterior realizárase directamente al presidente? L’actitú batallosa de Carmen Moriyón escontra Esteban Lázaro, pudiera ser una forma de despintar la responsabilidá de les persones venceyaes al so grupu políticu, tal qu’espresa lliteralmente la Sentencia”, añede Tuero.
Dicha sentencia declara, amás, como improcedente’l despidu del exgerente Esteban Lázaro Álvarez, poro, el PSOE esixi la so reincorporación inmediata nel so puestu de trabayu como director técnicu de EMULSA. El documentu dexa claro que s’atopó con dificultaes col departamentu de recursos humanos y l’económicu financieru p’aportar a la información. “Los responsables d’esos departamentos – y nun lo diz el PSOE, dizlo una Sentencia-, siguen nos sos puestos, mientres qu’a quien quixo “tirar del cobertor” despídese-y de forma improcedente. Esplica tamién que los motivos alegaos por Rodrigo Pintueles yeren falsos y sienta como fechos probaos les reticencies escontra él de los xefes de serviciu, por querer investigar les irregularidaes y que tenía correctes relaciones colos sindicatos. Diximos que Rodrigo Pintueles mentía, y agora un Xulgáu ratificalu. Alvertimos de que detrás del cese fulminante ya inxustificáu d’Esteban Álvarez podría tar Carmen Moriyón, que nun quería que’l Tribunal de Cuentes entrara en EMULSA a conocer la so situación financiera; la mesma sentencia reconoz que l’alcaldesa adoptó una actitú batallosa escontra Esteban Álvarez”, afirma’l conceyal socialista.
Los socialistes amuésense alarmaos porque esta ye la primer vegada que se declara improcedente un despidu ensin xustificar. “Ye un peligrosu precedente con unes riegles de xuegos que son nueves y que nun sabemos cómo van acabar, anque bien ye ciertu que pa Carmen Moriyón y pa Foro esto nun ye nuevu; yá en 2011, 2012 fixeron lo mesmo coles persones qu’entós daquella dirixíen la EMA”, conclúi Ramón Tuero.
